"Abşeron Rayon İcra Hakimiyyəti və Dini Qurumlarla İş üzrə Dövlət Komitəsinin Sumqayıt bölgəsi üzrə şöbəsinin birgə təşkilatçılığı ilə Xırdalan şəhər Mədəniyyət mərkəzində “Fitnə” sənədli filminin nümayişi olub.
Tədbirdə Abşeron Rayon İcra Hakimiyyəti Aparatının İctimai-siyasi və humanitar məsələlər üzrə şöbəsinin müdir müavini-dini qurumlarla işin təşkilatçısı Vüqar Bəşirov, DQİDK-nın Sumqayıt bölgəsi üzrə şöbəsinin əməkdaşı Orxan Axundov , Yeni Azərbaycan Partiyası Abşeron rayon təşkilatı Gənclər Birliyinin sədri Elgün Hümbətov, rayon Mədəniyyət mərkəzinin direktoru Nurlan Məmmədli, rayon mədəniyyət mərkəzinin bədii rəhbəri Çimnaz Qurbanova, rayon Təhsil şöbəsinin metodisti Aslan Həziyev, Abşeron informasiya agentliyinin rəhbəri Anar Nağıyev, rayonun təhsil və mədəniyyət işçiləri, din xadimləri və gənclər iştirak ediblər.
Tədbiri giriş sözü ilə açan Abşeron Rayon İcra Hakimiyyəti Aparatının İctimai-siyasi və humanitar məsələlər üzrə şöbə müdirinin müavini-dini qurumlarla işin təşkilatçısı Vüqar Bəşirov dövlət-din münasibətlərindən, ölkəmizdə milli-mənəvi və islami dəyərlərinin qorunması və təbliği sahəsində görülən işlərdən bəhs edib. Azərbaycan tolerant ölkədir və burada bütün dinlərin nümayəndələri azad şəraitdə öz ibadətləri ilə məşğul olur və əmin-amanlıq, mehriban qonşuluq çərçivəsində yaşayırlar. Azərbaycanda "İslam Həmrəyliyi ili" nin elan olunması dünyaya mühüm bir cağrışdır.
Çıxışının sonunda V. Bəşirov vurğuladı ki, "Fitnə" filmdə radikalizmin dini, psixoloji, hüquqi, siyasi və mənəvi tərəflərinin öz əksini tapdığını qeyd edib.
Daha sonra çıxış edən şöbənin baş məsləhətçisi O. Axundov qeyd etdi ki, DQİDK- nın sifarişi ilə hazırlanan “Fitnə” sənədli filmininin gənclərin maarifləndirilməsi, milli-mənəvi dəyərlərin və dini radikalizmin qarşısının alınması baxımından mühüm əhəmiyyət daşıdığını vurğulayıb. O, qeyd edib ki, bu sahədə mütəmadi şəkildə aparılan maarifləndirmə tədbirlərinin bir hissəsi olan bu film təsir baxımından daha effektiv bir vasitədir. Komitə tərəfindən bölgələrdə davamlı olaraq keçirilən belə tədbirlərin əsas məqsədi dini maarifləndirmə yolu ilə milli- mənəvi və islami dəyərlərin qorunması istiqamətində aparılan işlərə töhfə verməkdir.
