Azərbaycan xalqının azadlıq və müstəqillik uğrunda mücadiləsi tarixində şanlı səhifələr çox olmuşdur. Xalqımızın igid və qəhrəman oğulları bu yolda canlarından keçmiş, həyatlarını qurban vermişlər. Tariximizin belə səhifələrindən biri də 2016-ci ilin aprel hadisələridir.Bəli növbəti böyük qalibiyyətimizdən 2016 -cı ilin Aprel ayında Dağlıq Qarabağ uğrunda gedən döyüşlərdən 1 il ötdü. Lakin illərin ötüb keçməsinə baxmayaraq aprel döyüşlərində qəhrəmancasına şəhid olan soydaşlarımızın xatirəsi bizim qəlbimizdə bu gün kimi, dünənki kimi daim yaşayacaq.
Şəhid olan oğullarımız sırasında 2016-ci ilin aprel ayında Lələtəpə yüksəkliyi və ətraf ərazilərin ermənistan silahlı qüvvələrinin işğalından azad edilməsi uğrunda döyüşlərdə Abşeron rayonundan Şəhid olan Qobu qəsəbə sakini Əli İntiqam oğlu Heydərovda var. Bu gün şəhidin doğulub boya-başa çatdığı Qobu qəsbəsində şəhidin ildönümü ilə əlaqədar büstü qoyulub. Büst şəhidin dünyaya göz açdığı evin qarşısında, Şəhidlər muzeyində ucaldılıb.
Şəhidlər muzeyi önündə keçirilən mərasimində Abşeron rayon İcra Hakimiyyəti Başçısının müavini Fuad Cəbrayılov , aparatın məsul işçiləri, idarə, müəssisə, təşkilat rəhbərləri, Qarabağ Müharibəsi Veteranları, , yüzlərlə qəsəbə sakini, şəhidin yaxınları, doğmaları, ictimaiyyət və KİV nümayəndələri iştirak edib.
Mərasimdə Azərbaycanın müstəqilliyi və ərazi bütövlüyü uğrunda şəhid olanların xatirəsi bir dəqiqəlik sükutla yad edilib.
Rayon İcra Hakimiyyəti başçısının müavini Fuad Cəbrayılov şəhidin ailəsinə başsağlığı verib və aprel döyüşləri zamanı hərbçilərimizin döyüş meydanında göstərdiyi şücaətdən danışıb. Bildirib ki, dördgünlük savaşda düşmən ordumuzun qüdrəti qarşısında vahiməyə düşərək bir daha əmin oldu ki, Azərbaycanın güclü ordusu var və Azərbaycan əsgəri qələbə qazanmaq əzmindədir.
F. Cəbrayılov çıxışı zamanı Ali Baş Komandan İlham Əliyevin əmri ilə döyüşə hər an hazır olan silahlı qüvvələrimizin ölkəmizin ərazi bütövlüyünü təmin edəcəyi günün çox da uzaqda olmadığını, qəhrəmanlarımızın qanının yerdə qalmayacağını bildirib.
Şəhidin anası Svetlana Heydərova çıxış edərək mərasimdə iştirak edən qonaqlara öz minnətdarlığını bildirərək qeyd edib ki, bu gün bir daha əmin oldum ki, Əli ölməyib, o, bu gün yaşayır. Şəhid anası övladının vətən uğrunda həlak olmasını qürurla qarşıladığını deyib.
Daha sonra çıxış edənlər şəhidlərin göstərdiyi qəhrəmanlıqlardan, ordumuzun cəbhədəki uğurlarından söz açıb, Azərbaycan Ordusunun qüdrəti, gənclərimizin Vətən sevgisi, əsgərlərimizin döyüşlərdəki şücaəti, Silahlı Qüvvələrimizin gücü, xalq və ordu birliyi barəsində danışıblar. Qeyd ediblər ki, torpaqlarımızın ərazi bütövlüyü uğrunda canlarından keçən bütün şəhidlərimiz kimi Əli Heydərovda daim qəlblərdə yaşayacaq və onun əziz xatirəsi hər zaman yad ediləcəkdir.
Sonra Qobu qəsəbə 1 saylı tam orta məktəbin şagirdləri Vətənə, şəhidlərə həsr olunan şeirlər söyləyiblər.
Anım mərasimi Qobu qəsəbəsində şəhidin adına açılan ehsan süfrəsi ilə davam etdirilib.
Büstün müəllifi Qobulu heykəltəraş Vasif Atababayevdir .
Məlumat üçün qeyd edək ki, Əli İntiqam oğlu Heydərov göstərdiyi qəhrəmanlığa görə Azərbaycan Respublikasının Prezidenti İlham Əliyevin sərəncamı ilə «Hərbi xidmətdə fərqlənməyə görə» III dərəcəli medalı ilə təltif edilmişdir
Şamo Əliyev