Milli bayramımız, baharın müjdəçisi Novruzu uşaqlar daha çox sevir və gəlişini səbirsizliklə gözləyirlər. Hər il bu əziz bayram şərəfinə məktəbəqədər təhsil müəssisələrində bir-birindən maraqlı, yaddaqalan mərasimlər təşkil olunur. Bu il də Novruzun gəlişini uşaqlar böyük sevinclə qarşılayırlar.
Rayon bağçalarında novruz bayramına həsr olunmuş silsilə tədbirlər bu qədim və milli bayrama sevginin bu gün də azalmadığının göstəricisidir. Belə tədbirlərdən biri də Xırdalan şəhərindəki 15 saylı körpələr evi-uşaq bağçasında keçirilib.
Bağçanın həyətində düzənlənmiş şənlikdə Abşeron Rayon İcra Hakimiyyəti başçısının müavini Fuad Cəbrayılov, icra hakimiyyətinin əməkdaşları, rayon bağçalarının müdür və tərbiyəçiləri, valideynlər, KİV nümayəndələri iştirak edib.
Tədbir iştirakçıları əvvəlcə bağça qrupları tərəfindən hazırlanmış Novruz stendləri ilə tanış olublar.
Bayram libasına bürünmüş bağçanın həyətində milli geyimli qızlar bayram xörəklərini nümayiş etdirib, şənlik iştirakçılarını ənənəvi şirniyyata qonaq ediblər. Şənlikdə F.Cəbrayılov Novruz bayramının simvolları olan kosa və keçəllə yumuta da döyüşdürüb.
Şənlikdə Novruz tonqalı qalanıb. Milli geyimli körpə fidanlar və qonaqlar tonqalın ətrafında dövrə vuraraq yallı gediblər.
Bayram tədbirində çıxış edən F.Cəbrayılov müəllim və uşaqları Abşeron Rayon İcra Hakimiyyətinin başçısı İradə Gülməmmədovanın adından təbrik edərək, onlara Novruz təravəti arzulayıb. Abşeron bağçaları tərəfindən bütün bayramlarda bir-birindən maraqlı, rəngarəng şənliklər keçirildiyini və onların ildən ilə təkmilləşdirildiyini qeyd edən F.Cəbrayılov bildirib ki, bu qəbildən olan tədbirlər uşaqların dünyagörüşünün formalaşmasında, bayramlarımıza olan sevgilərinin artmasında və adət-ənənələrimizin nəsildən nəsilə ötürülməsində böyük əhəmiyyətə malikdir. RİH başçısının müavini qeyd edib ki, inşallah gələn bayramlarımızı işğaldan azad edəcəyimiz Dağlıq Qarabağımızda, Şuşada,Xankəndində, Xocalıda və işğal altında olan digər o gözəl bölgələrimizdə qeyd edəcəyik.
Sonra xalqımızın qədim tarixini, milli adət-ənənələrimizi əks etdirən atributlarla bəzədilmiş bağçanın musiqi zalında uşaqların hazırladıqları bayram səhnələri təqdim olunub. Milli geyimdə olan uşaqlar Novruza dair şerlər söyləyib, milli rəqslər nümayiş etdirib.
Sonda çıxış edən bağçanın müdiri Mətanət Novruzova bildirib ki, bayram şənliyini keçirməkdə əsas məqsəd balacalarımıza milli adət-ənənələrimizi aşılamaqdır. Körpələrimiz o zaman insanların bayramı necə qeyd etdiklərini bir az da olsa hiss edəcəklər.
Şamo Əliyev