Fatmayi kəndində rayonun uzunömürlü ağbirçəklərindən biri- Muradova Gülfirə Hacıağa qızınının 70 illik yubileyi təntənə ilə qeyd edilib.
Mərasimdə Abşeron rayon İcra Hakimiyyətinin şöbə müdiri Azər Məmmədov, dövlət rəsmiləri, yubilyarın övladları, nəvə-nəticələri, iştirak ediblər.
İcra rəsmisi Azər Məmmədov Gülfirə Muradovanı rayonda işlədiyi 45 ildə işinə məsuliyyətli işçi kimi xarakterizə edərək Abşeron rayon İcra Hakimiyyəti başçısı İradə Gülməmmədovanın imzaladığı fəxri fərmanı və pul mükafatını yubilyara təqdim edib.
Bildirilib ki, G.Muradova Abşeron rayon İcra Hakimiyyəti başçısının Fatmayi kənd inzibati ərazi dairəsi üzrə nümayəndəliyində müavin vəzifəsində çalışdığı müddətdə kollektivin dərin hörmətini qazanıb, öhdəsinə düşən vəzifənin öhdəsindən layiqincə gəlib, rayon ictimaiyyəti arasında böyük hörmət qazanıb.
Daha sonra çıxış edənlər G.Muradovanı əlamətdar gün münasibətilə təbrik edib, ölkəmizdə qadınların ictimai-siyasi fəallığının yüksəldilməsi, analıq hüququnun qorunması, idarəetmədə onların məsul vəzifələrə irəli çəkilməsi istiqamətində görülən işlərdən danışıblar.
Şirniyyat süfrəsi ətrafında davam edən mərasimdə çıxış edən G.Muradova bütün iştirakçılara uzunömürlülük arzulayaraq, Abşeron rayonunda yaşlı nəslin nümayəndələrinə göstərilən diqqət və qayğıya görə Abşeron rayon İcra Hakimiyyətinin başçısı İradə Gülməmmədovaya minnətdarlığını bildirib.
Şamo Əliyev