Baharın gəlişinin carçısı olan Novruz bayramı Abşeron rayonunda da böyük izdihamla qeyd olundu. Bu gün Xırdalan şəhərindəki ümummilli lider Heydər Əliyevin adını daşıyan parkda ümumrayon bayram şənliyi keçirildi.
İlk dəfə olaraq şənliyə 3100 nəfərdən çox milli geyimli xanım və kişilər qatıldı. Qeyd etmək lazımdır ki, bu, Azərbaycanda keçirilən tədbirlərdə milli geyimli iştirakçıların sayına görə yeganə şənlikdir. Hələ bu vaxta qədər 3100 nəfərdən çox milli geyimli soydaşlarımız bir araya gəlməmişdi.
Dədə Qorqud və Bahar qız yazın gəlişini müjdə verməklə abşeronluların əhvali-ruhiyyəsinə bayram ovqatı qatdı. Bayram şənliyinin məşəlini alovlandırmaq üçün “Yanardağ” Dövlət-Tarix Mədəniyyət və Təbiət Qoruğundan gətirilən alovla tonqal qalandı. Meydanda alovlanan tonqal qədim Oğuz yurdunun bir parçası olan Abşeronda Novruz şənliyinin ən maraqlı məqamlarından biri oldu.
Rayon İcra Hakimiyyətinin başçısı İradə Gülməmmədovanın, hüquq-mühafizə orqanlarının, ictimaiyyət nümayəndələrinin qatıldığı bayram şənliyində xalq oyunları, milli rəqslər, vətənimizi tərənnüm edən musiqilər, keçəl və kosanın məzəli əhvalatları, xoruz döyüşü, cəngi sədaları altında idmançıların rəngarəng çıxışları və kəndirbazların akrobatik hərəkətləri abşeronluların əhvali-ruhiyyəsinə bayram ovqatı qatdı.
Yazın gəlişini bildirən və xalqımızın milli–mənəvi dəyərlərini özündə ehtiva edən müxtəlif oyunlar, ümumtəhsil məktəblərinin, məktəbəqədər tərbiyə müəssisələrinin Novruzun və xalqımızın qədim milli ənənələri ilə bağlı hazırladıqları ədəbi-bədii kompozisiyaları, şerləri, folklor kollektivlərinin maraqlı çıxışları, xalçalar, şagirdlərin əl işlərindən ibarət rəsm sərgiləri, milli mətbəximizin ləziz təamları bayram tədbirinin iştirakçıları tərəfindən rəğbətlə qarşılandı.
Milli geyimli qızlar bayram xörəklərini nümayiş etdirdi, şənlik iştirakçılarını şirniyyata qonaq etdilər. Gəzintidən sonra tanınmış incəsənət xadimləri və Abşeron Mədəniyyət Evinin kollektivi tərəfindən konsert proqramı təqdim edildi.
Bayram tədbirində bildirildi ki, xalqımız qədim türk məişətini, əxlaqını, inancını və bədii zövqünü özündə cəmləşdirən Novruz bayramı ayinlərini tarixən yaşadaraq bu günümüzədək gətirdiyi kimi, bu gün də bizi birləşdirir, daha da həmrəy edir. Bu ənənəni yaşatmaq və gələcək nəsillərə ötürmək hər kəsin müqəddəs borcudur.
Bolluğun, bərəkətin və xeyirxahlığın təcəssümü olan Novruz şənliyi incəsənət ustalarının ifasında geniş konsert proqramı ilə davam etdi.
Şamo Əliyev