Bu gün Abşeron Rayon İcra Hakimiyyətində Abşeron rayonunda məskunlaşmış Xocalı sakinləri ilə görüş keçirilmişdir. İlk öncə Xocalı faciəsində şəhid olmuş insanların əziz xatirəsi 1 dəqiqəlik sükütla yad edildi.
Görüşdə çıxış edən Abşeron Rayon İcra Hakimiyyəti başçısının humanitar məsələlər üzrə müavini xanım İradə Gülməmmədova 1992-ci il fevralın 25-dən 26-na keçən gecə xüsusi qəddarlıqla törədilmiş Xocalı faciəsinin erməni şovinist-millətçiləri tərəfindən azərbaycanlılara qarşı müntəzəm olaraq həyata keçirilən etnik təmizləmə və soyqırım siyasətinin davamı, ən qanlı səhifəsi kimi vurğuladı. Xocalı qətliamı Ermənistanın Dağlıq Qarabağı işğal etmək məqsədi ilə apardığı işğalçılıq müharibəsinin gedişində dinc azərbaycanlı əhaliyə qarşı törədilmiş soyqırımı cinayətlərinin miqyasca ən dəhşətlisi olduğunu bildərərək bu faciənin dünya miqyasında tanıdılması istiqamətində dövlətimiz tərəfindən aparılan məqsədyönlü işlər barədə danışdı. Bu gün hər bir vətəndaş kimi Xocalılara da xüsusi diqqət və qayğının mövducluğunu söyləyərək onların acılarına hər kəsin şərik olduğunu bildirdi. Görüşün sonunda Abşeron rayonu ərazisində yaşayan Xocalı ailələrinə rayon İcra hakimiyyəti tərəfindən maddi yardım verildi.
