Abşeron Rayon İcra Hakimiyyəti, Abşeron Rayon Gənclər və İdman İdarəsi, Abşeron Rayon Mərkəzi Xəstəxanasının və Abşeron Rayon Təhsil Şobəsinin birgə təşkilatçılığı ilə ümumtəhsil müəssisələrində fiziki aktivliyin təbliği ilə bağlı rayon məktəbliləri arasında idmanın voleybol, basketbol, stolüstü tenis, mini-futbol növləri üzrə keçirilən yarışların final mərhələsi keçirilib.
Dövlət tərəfindən idmanın kütləviliyinin təmin edilməsi istiqamətində müxtəlif və böyükmiqyaslı layihələrin icra olunduğunu vurğulayan Abşeron RİH-nin əməkdaşı Vüqar Bəşirov qeyd edib ki, ölkədə sağlam nəslin formalaşması, idman sahəsində böyük nailiyyətlərin əldə edilməsi məhz ulu öndər Heydər Əliyevin memarı olduğu uğurlu gənclər siyasətinin nəticəsidir. Bu siyasət Prezident İlham Əliyev tərəfindən uğurla davam etdirilir və bunun nəticəsində gənclərimiz daha böyük nailiyyətlər qazanırlar. Bu gün Azərbaycan gənci dövlətin hərtərəfli diqqət və qayğısı ilə əhatə olunub.
Qalib komandaları təbrik edən Abşeron rayon Gənclər və İdman İdarəsinin rəisi Əsgər Əmrəliyev bildirib ki, son illərdə respublikamızda bədən tərbiyəsi və idmanın inkişafı, habelə idmanın bütün növləri üzrə qazanılmış uğurların ilbəil artması ümummilli lider Heydər Əliyevin layiqli davamçısı Prezident İlham Əliyevin bədən tərbiyəsi və idmana göstərdiyi diqqət və qayğının nəticəsidir.
Sonda Qaliblər Abşeron Rayon Gənclər və İdman İdarəsi tərəfindən diplom və medallarla ilə təltif ediliblər.
Qeyd edək ki, Gənclərin Sağlamlıq Festivalı “Azərbaycan gəncliyi 2017-2021-ci illərdə” Dövlət Proqramı və “Azərbaycan Respublikasında qeyri-infeksion xəstəliklərlə mübarizəyə dair 2015-2020-ci illər üçün Strategiya”sının 9.2.1 bəndinin icrasına uyğun olaraq əhaliyə sağlam həyat tərzini aşılamaq, fiziki aktiv olmağın sağlamlığa olan faydaları barədə ictimaiyyəti bir daha məlumatlandırmaq məqsədi daşıyır. Məlum olduğu kimi Azərbaycan da daxil olmaqla, dünyanın bir sıra ölkələrində yaşlı nəsillə bərabər cavanların da daha çox oturaq həyat tərzi keçirməsi bir sıra qeyri-infeksion xəstəliklərin inkişafına təsir göstərir. Fiziki aktivlik, eyni zamanda, yeniyetmə və gənclər arasında yayılan piylənmə, ürək-damar xəstəlikləri və depressiyaya qarşı ən effektiv profilaktika metodlarından biri olduğuna görə Gənclərin Sağlamlıq Festivalının keçirilməsi sağlam həyat tərzinin təbliği üçün də çox vacibdir.