Azərbaycan Respublikasında 2025-ci ilin “Konstitusiya və Suverenlik İli” elan olunması ilə bağlı Prezident İlham Əliyevin 28 dekabr 2024-cü il tarixli Sərəncamından irəli gələn tapşırıqlar çərçivəsində ölkədə hüquqi maarifləndirmə və hüquqa çıxış imkanlarının genişləndirilməsi istiqamətində tədbirlər davam etdirilir.
Bu məqsədlə Azərbaycan Respublikası Milli Məclisinin Sədri hörmətli Sahibə Qafarovanın təşəbbüsü ilə Milli Məclis və Azərbaycan Respublikası Vəkillər Kollegiyasının birgə təşkilatçılığı ilə aztəminatlı və həssas kateqoriyadan olan vətəndaşlara ödənişsiz hüquqi yardım aksiyaları keçirilir.
3 noyabr 2025-ci il tarixində Abşeron rayonunun Şəfəq qəsəbəsində belə aksiyalardan biri baş tutub. Tədbirdə VII çağırış Milli Məclisin deputatı Zaur Şükürov, Abşeron Rayon İcra Hakimiyyəti başçısının müavini İlkin Əsədov, Milli Məclis Aparatının məsul əməkdaşı Sevil Hacıyeva, Vəkillər Kollegiyasının nümayəndələri və digər aidiyyəti qurumların təmsilçiləri iştirak ediblər.
Görüş çərçivəsində vətəndaşlarla fərdi qaydada söhbətlər aparılıb, onların müraciətləri dinlənilib. Sosial müdafiə, məşğulluq, torpaq və mülkiyyət münasibətləri, sosial xidmətlər və digər sahələr üzrə suallar cavablandırılıb, yerində hüquqi yardım və izahatlar təqdim olunub.
Tədbirdə qeyd olunub ki, bu cür sosial yönümlü layihələr dövlət-vətəndaş həmrəyliyinin möhkəmləndirilməsinə, hüquqi biliklərin artırılmasına və vətəndaş məmnuniyyətinin təmin edilməsinə mühüm töhfə verir.
Abşeron Rayon İcra Hakimiyyəti tərəfindən də vətəndaşların qaldırdıqları məsələlərin operativ həlli məqsədilə müvafiq struktur bölmələrə tapşırıqlar verilib.
Bu kimi aksiyalar gələcəkdə də davam etdirilərək, regionlarda sosial rifahın və hüquqa çıxış imkanlarının daha da genişləndirilməsinə yönələcək.
