Abşeron Rayon İcra Hakimiyyəti tərəfindən Azərbaycan Respublikası Prezidentinin 28 avqust 2023-cü il tarixli, 4059 nömrəli Sərəncamı ilə təsdiq edilmiş “Azərbaycan Respublikasında sosial xidmətin inkişafına dair 2023–2026-cı illər üçün Dövlət Proqramı”nın 8.4.3-cü bəndinin icrası çərçivəsində Abşeron rayonunda sosial xidmətlərlə bağlı geniş maarifləndirmə tədbirləri həyata keçirilib.
Tədbirlərin əsas məqsədi əhalinin sosial xidmətlər barədə məlumatlandırılması, bu xidmətlərə əlçatanlığın artırılması və ünvanlılığın təmin olunması olub.
Hesabat dövründə rayon ərazisində yaşayan aztəminatlı ailələr, ahıl şəxslər, şəhid ailələri, müharibə iştirakçıları, əlilliyi olan şəxslər, eləcə də tənha və xüsusi qayğıya ehtiyacı olan vətəndaşlar arasında mövcud sosial xidmətlər, sosial dəstək mexanizmləri və dövlət tərəfindən göstərilən sosial təminat tədbirləri barədə məlumatlandırma işləri aparılıb.
Xırdalan şəhəri ilə yanaşı, rayonun qəsəbə və kənd inzibati ərazi dairələri üzrə nümayəndəliklərində vətəndaşlarla görüşlər təşkil olunub, sosial xidmətlərin növləri, müraciət qaydaları, elektron xidmət imkanları, sosial yardım və sosial reabilitasiya xidmətləri barədə ətraflı izahatlar verilib. Eyni zamanda, əhali arasında maarifləndirici bukletlər və informasiya materialları paylanılıb.
Tədbirlər zamanı aidiyyəti qurumların nümayəndələrinin iştirakı ilə sosial xidmətlərin ünvanlılığının artırılması, vətəndaş müraciətlərinə operativ baxılması, həssas qrupların sosial müdafiəsinin gücləndirilməsi və mövcud problemlərin yerində öyrənilməsi məsələləri də müzakirə olunub.
Görülən tədbirlərin məqsədi əhalinin sosial xidmətlər barədə məlumatlılıq səviyyəsinin artırılması, sosial xidmətlərə çıxış imkanlarının genişləndirilməsi və sosial müdafiə mexanizmlərinin daha effektiv şəkildə tətbiq olunmasının təmin edilməsidir. Bu istiqamətdə maarifləndirmə tədbirlərinin davam etdirildiyi bildirilib.
