Mehdiabad bələdiyyəsinin yeni seçilmiş sədri və bələdiyyə üzvləri tərəfindən qəsəbə ərazisində aşkar edilən nöqsan və haqlı narazılıqların aradan qaldırılması istiqamətində genişmiqyaslı işlərə start verilib. İlkin mərhələdə qəsəbə ərazisində yeni pilot layihə - bərk məişət tullantılarının yığılması, daşınmasının ən müasir səviyyədə təşkil edilməsi layihəsinin icrasına başlanılıb. Belə ki, qəsəbənin Cəfər Cabbarlı küçəsində toplanan məişət tullantıları, “Təzə məhəllə” adlanan ərazidə isə qazılmış torpaq xüsusi nəqliyyat vasitələri ilə ərazilərdən daşınıb.
Kanalizasiya xətti çəkilərkən qazılan Maqsud Abdullayev küçəsində daxili imkanlar hesabına sözügedən yolun təmir-bərpası işləri üçün yararlı material tökülərək kipləşdirmə işləri aparılıb. Bütün bunlarla yanaşı qəsəbənin Məşədi Əzizbəyov küçəsində hasarların suvaq işləri aparılır, Əhməd Cavad və Əhməd Cavad 2 küçələrin isə asfalt qırıntıları tökülərək hərəkət üçün yaralı vəziyyətə gətirilir.
Məlumat üçün bildirək ki, hal-hazırda Prezident İlham Əliyevin yanvarın 9-da “Abşeron rayonunun ərazisində avtomobil yollarının əsaslı təmiri ilə bağlı əlavə tədbirlər haqqında” imzaladığı Sərəncama əsasən Mehdiabad qəsəbəsinin Qara Qayev küçəsinin Azərbaycan Avtomobil Yolları Dövlət Agentliyi tərəfindən yenidən əsaslı şəkildə qurulması işlərinə başlanılıb.Prezident İlham Əliyevin sərəncamına əsasən, anoloji təmir işləri Mehdiabad qəsəbəsinin Cəfər Cabarlı, Əhməd Cavad və Çingiz Mustafayev küçələrində də aparılacaq.