Ölkə Prezidenti cənab İlham Əliyevin yürütdüyü məqsədyönlü dövlət siyasətinin əsasını təşkil edən vətəndaş amili Abşeron rayonunda daim diqqət mərkəzində saxlanılır. Son 5 ildə rayon rəhbərliyi tərəfindən vətəndaşların ərizə və müraciətlərinə əsasən fərdi şəkildə keçirilən qəbullar, sakinlərlə keçirilən səyyar görüşlərdə səslənən fikirlərə, qaldırılan məsələlərə operativ şəkildə baxılması bunun bariz nümunəsidir.
Abşeron Rayon İcra Hakimiyyətinin başçısı İradə Gülməmmədovanın rəhbər təyin olunduğu ilk gündən kənd və qəsəbələrdə keçirdiyi səyyar görüşlər də məhz sakinləri narahat edən məsələlərin öz müsbət həllini tapmasına xidmət edir. İcra başçısının səyyar görüşdə səsləndirilən hər bir məsələyə xüsusi qayğı ilə yanaşması, həlli istiqamətində konkret tapşırıqlar verməsi bunu hər zaman sübut edir.
İ.Gülməmmədovanın ötən ilin noyabrın 21-də rayonun Ceyranbatan qəsəbəsində keçirilən səyyar görüşü zamanı sakinlər Kamran Hüseynov küçəsinin abadlaşdırılması barədə müraciət etmişdilər. Sakinlərlə keçirilən görüş zamanı verilən tapşırıq öz müsbət nəticəsini verib. Belə ki, hazırda rayon rəhbərinin tapşırığına əsasən rayonun daxili imkanları hesabına Ceyranbatan qəsəbəsinin Kamran Hüseynov küçəsində təmir işləri aparılır. Belə ki, uzunluğu 1.3 km, eni isə 8 metr olan küçəyə asfalt qırıntısı və çınqıl tökülərək yayılıb.
Eyni zamanda Prezident İlham Əliyevin yanvarın 9-da “Abşeron rayonunun ərazisində avtomobil yollarının əsaslı təmiri ilə bağlı əlavə tədbirlər haqqında” imzaladığı Sərəncama əsasən, Ceyranbatan qəsəbəsinin ümumi uzunluğu 1,2 kilometr olan Heydər Əliyev küçəsi Azərbaycan Avtomobil Yolları Dövlət Agentliyi tərəfindən əsaslı şəkildə yenidən qurulacaq.