Abşeron rayonunda vətəndaş amili əsas götürülür, xüsusən də ölkə rəhbərinin vətəndaşlarla bağlı verdiyi tapşırıq və tövsiyələr birmənalı şəkildə icra olunur. Rayon İcra Hakimiyyətinin başçısı İradə Gülməmmədova rəhbər təyin olunduğu ilk gündən vətəndaş amilini iş fəaliyyətinin əsası hesab etməsi də bunun əyani sübutudur. Məhz bu səbəbdən rayonda vətəndaş-məmur münasibəti dövlətə, ölkə rəhbərinə və icra başçısına olan böyük inam üzərində qurulub. İllər öncə formalaşan bu münasibət, arada olan hörmət və istək bu gün də o qaydada davam etdirilir. Bunu icra başçısının sakinlərə olan səmimi münasibətindən, vətəndaşlara göstərdiyi diqqət və qayğısından, şəhər, kənd və qəsəbələrdə keçirilən görüşlərdə səslənən müraciətlərə operativ şəkildə baxılmasından, vətəndaşların yaşadığı ünvandan asılı olmayaraq istəyinə əsasən yerində baxış keçirilməsindən, qaldırılan məsələlərin həlli istiqamətində yerindəcə tapşırıq verilməsindən aydın şəkildə görmək olur.
Bu günlərdə Abşeron Rayon İcra Hakimiyyətinin başçısı İradə Gülməmmədova bir qrup Aşağı Güzdək qəsəbə sakininin müraciətinə əsasən həmin qəsəbədə olub. Vətəndaşların su məsələsi ilə bağlı müraciətlərini yerində dinləyən icra başçısı qeyd olunan məsələlərin aradan qaldırılması istiqamətində aidiyyəti üzrə müvafiq tapşırıqlarını verib.
Rayon rəhbəri İradə Gülməmmədovanın adiyyatı qurumlar qarşısında qaldırdığı məsələnin, “Azərsu” rəhbərliyi ilə apardığı danışıqların nəticəsi olaraq, artıq Aşağı Güzdək qəsəbəsində 250 ailənin yaşadığı əraziyə yeni xətlərlə suyun verilməsi bərpa edilib.
Qəsəbə sakinlərindən Nemət Lətifov, Canməmməd Hüseynov, Qubad Paşayev və başqaları onların istəyini nəzərə alıb müraciətlərinə həssaslıqla yanaşdığına, qeyd etdikləri məsələlərin həlli ilə bağlı verdiyi tapşırıqlara görə rayon rəhbərinə minnətdarlıqlarını bildiriblər.
