YAP Abşeron rayon təşkilatı, Könüllülük Fəaliyyətinin Təbliği ictimai birliyi və Bakı-Sumqayıt şosesi 8 ərazi partiya təşkilatının (Xırdalan şəhər 10 saylı orta məktəb) birgə təşkilatçılığı ilə “Zəfər yolunda 44 gün - Vətən müharibəsində qələbəmizin təbliği” layihəsi çərçivəsində Xırdalan şəhər 10 saylı orta məktəbində tədbir keçirilmiş və “Zəfər Yolunda 44 gün “kitabının təqdimat mərasimi baş tutmuşdur. Tədbir iştirakçıları Ümummilli Lider Heydər Əliyevin və 44 günlük Vətən müharibəsində şəhid olan qəhrəmanlarımızın xatirəsini bir dəqiqəlik sükutla yad ediblər. Təqdimat mərasimi zamanı çıxış edənlər layihənin məqsədi və hədəfləri haqqında danışaraq qeyd etdilər ki, layihənin məqsədi 44 günlük Vətən müharibəsi zamanı Azərbaycan xalqının nümayiş etdirdiyi həmrəyliyi, Ali Baş Komandanın müdrik və uzaqgörən siyasətini, Azərbaycan ordusunun rəşadətini, əsgərlərimizin qəhrəmanlıq və cəsarətini təbliğ etmək, bu məlumatları gənclərimizə və gələcək nəsillərə ötürməkdir. Kitabda Ali Baş Komandanımız, Prezidentimiz İlham Əliyevin apardığı uğurlu siyasət, Azərbaycanın müzəffər ordusunun şücaəti, cəsarəti sayəsində torpaqlarımızın işğaldan azad olunduğu, 44 günlük mücadiləmizin qələbə ilə nəticələnməsi xüsusi şəkildə qeyd olunub. Bu kitabda qalibiyyətimizin sevincinin tərənnüm olunduğunu bildiriblər. Çıxış edənlər gənclərin vətənpərvərlik ruhunda tərbiyə olunmasında bu kitabların mühüm rol oynayacağını qeyd edərək, 44 günlük Zəfər Savaşında Azərbaycan oğullarının göstərdikləri əvəzolunmaz igidliklər haqqında kitabların yazılmasını böyük uğur adlandırmış, müəllifə və zəhməti keçən hər kəsə bu ağır və məsuliyyətli işin öhdəsindən ləyaqətlə gəldiklərinə görə təşəkkürlərini bildiriblər.
Sonda tədbir iştirakçılarına layihə çərçivəsində hazırlanmış “Zəfər yolunda 44 gün” kitabı və buklet hədiyyə edildi.
