Böyük Vətən müharibəsi illərində (1941-1945) Moskvadan Berlinə kimi döyüş yolu keçmiş veteran Allahverdi Qənbərov martın 27-də Abşeron rayonunun Mehdiabad qəsəbəsində dünyasını dəyişib.
1926-cı ildə Qafan rayonunun doğulmuş A. Qəmbərov 18 yaşında ordu sıralarına çağırılıb, Moskvadan Berlinə kimi döyüş yolu keçib. Bir sıra ağır çarpışmaların, o cümlədən tarixi "Oder döyüşü"nün iştirakçısı olub. Əsasən hərbi kəşfiyyat və mühafizə-təhlükəsizlik xidmətində çalışan Allahverdi kişi dəfələrlə ölüm təhlükəsi ilə üzləşib, bir neçə dəfə yaralanıb.
Müharibə illərində Allahverdi Qənbərov döyüşən ordu sıralarında Berlinin alınmasında da iştirak edib.Vətən uğrundakı rəşadətli xidmətlərinə görə müxtəlif döyüş ordenləri ilə təltif edilib.
1950-ci ildə ordudan tərxis olunduqdan sonra Qafan rayonunda yaşayan Allahverdi Qənbərov 38 il ferma müdiri işləyib.
1988-ci ildə erməni qəsbkarlarının yürütdüyü təcavüzkar siyasət nəticəsində öz el-obasından deportasiya edilib. Həmin tarixdən etibarən Abşeron rayonunun Mehdiabad qəsəbəsində məskunlaşıb, müxtəlif təsərrüfat işlərində çalışıb. Martın 27-də 92 yaşında dünyasını dəyişən Allahverdi kişinin 6 övladı,16 nəvəsi, 16 nəticəsi var.
Absheronxeber.az komandası adından mərhumun ailəsinə, yaxınlarına dərin hüznlə başsağlığı veririk. Allah rəhmət etsin!