Fevralın 21-də Cəfər Cabbarlı adına Respublika Gənclər Kitabxanasında 21 fevral – Beynəlxalq Ana Dili Günü münasibətilə “Ana dilimizi sevək” adlı tədbir keçirilib.
AZƏRTAC xəbər verir ki, kitabxananın direktoru Oruc Quliyev UNESCO tərəfindən milli dillərin və mədəni müxtəlifliyin qorunması və təbliği məqsədilə təsis edilmiş bu əlamətdar günün tarixindən danışıb.
Bildirib ki, ölkəmizdə Azərbaycan dilinin hərtərəfli inkişafı və işlək dilə çevrilməsi, dilimizin gözəl bilicisi, mahir natiq ulu öndər Heydər Əliyevin dilin qorunmasına yönələn düşünülmüş siyasətinin nəticəsidir.
Kitabxananın elmi işlər üzrə direktor müavini Xalidə Musayeva vurğulayıb ki, dünyada məhv olmaq təhlükəsi ilə üzləşən dillərin qorunması məqsədilə hər il keçirilən Beynəlxalq Ana Dili Günü hər kəsə öz doğma dilinin varlığını hiss etmək, onunla qürur duymaq, onu qorumaq, inkişaf etdirmək hüququ olduğunu bir daha xatırladır.
175 nömrəli orta məktəbin direktoru Tural Mirzəliyev dövlət dili olan Azərbaycan dilinin zənginliyindən, ifadə imkanlarından danışıb.
“Həkəri” qəzetinin baş redaktoru, şair, publisist Rauf İlyasoğlu, yazıçı-publisist, tərcüməçi Azər Hacıbəyli, Bakı İslam Universitetinin kafedra müdiri Elvin Talışinski və başqaları 1978-ci ildə ana dilimizin “Dövlət dili” statusu alması, müasir gəncliyin öz doğma dilindən savayı digər dilləri də öyrənib sərbəst danışmaları ətrafında çıxış ediblər. Tədbir konsert proqramı ilə davam edib.
Sonda qonaqlar “Ana dilim, doğma dilim” adlı kitab sərgisinə baxıblar.