Daşkənd vilayətinin Buka şəhərindəki 15 nömrəli uşaq evində keçirilən Novruz şənliyində Daşkənddəki Heydər Əliyev adına Azərbaycan Mədəniyyət Mərkəzi (AMM) də iştirak edib.
Əvvəlcə uşaqlar və müəllimlər Mədəniyyət Mərkəzinin foyesində təşkil olunan kitab, foto, Azərbaycanın mənzərələri, Qarabağın milli qadın və kişi geyimləri, suvenirlərdən ibarət sərgi ilə tanış olublar. Sərgidə ölkəmizin tarixi, mədəniyyəti, ədəbiyyatına dair çap olunan çoxsaylı nəşrlər, habelə ölkəmizin təbliğinə dair Heydər Əliyev Fondu tərəfindən Azərbaycanın tarixi, mədəniyyəti, ümummilli lider Heydər Əliyevin həyat və fəaliyyəti, Prezident İlham Əliyevin həyata keçirdiyi islahatlarla bağlı nəşrlər, dövlətçiliyimizə dair kitablar nümayiş olunub.
AMM-nin direktor müavini Polad Zeynalov iki ölkənin dostluğundan danışıb, bu dostluğun möhkəmlənməsi, xalqlarımız arasında əlaqələrin gələcək inkişafında uşaqların üzərinə böyük məsuliyyət düşdüyünü qeyd edib. O, çıxışında uşaqların elm və biliklərə yiyələnməsinin vacib olduğunu vurğulayıb, Azərbaycan dövlətinin, Heydər Əliyev Fondunun ölkəmizdə uşaq evlərinə qayğısı, onların fəaliyyətinin yüksək səviyyədə qurulması istiqamətində görülən işlərdən danışıb.
Sonra uşaqlar özbək və dünya xalqlarının mahnı və rəqslərini, AMM-nin nəzdindəki “Azərbaycan qızları” uşaq rəqs ansamblının üzvləri milli rəqslərimizi ifa ediblər.
Konsert başa çatdıqdan sonra uşaqlar bayram süfrəsinə dəvət olunub, onlar plov və müxtəlif şirniyyatlara qonaq ediliblər.