Hər il olduğu kimi, bu il də paytaxt Bakıda xalqımızın sevimli bayramı olan Novruz yüksək səviyyədə qeyd olunub.
Bu münasibətlə şəhərin müxtəlif məkanlarında konsert, festival, yarmarka və digər tədbirlər təşkil edilib.
Belə ki, bayram günlərində Mədəniyyət və Turizm Nazirliyi, Milli Turizm Təbliğat Bürosu və Bakı Şəhər Mədəniyyət və Turizm Baş İdarəsinin dəstəyi ilə Fəvvarələr meydanında bayram yarmarkası açılıb. Yarmarka çərçivəsində ölkənin müxtəlif regionlarından folklor ansamblları, həmçinin tanınmış müğənnilər Bakı sakinləri və şəhərin qonaqları qarşısında çıxış ediblər.
Novruz yarmarkasında ziyarətçilər milli tətbiqi sənət nümunələri, o cümlədən zərgər məmulatları, suvenirlər, geyimlərlə tanış olub, həmçinin milli mətbəximizin ləziz təamlarından dadıblar.
Paytaxt sakinləri ilə yanaşı, şəhərimizin qonağı olan çoxsaylı turistlərin də izlədiyi bayram tədbirləri böyük maraqla qarşılanıb.