Bu gün – 12 dekabr, Azərbaycan xalqı üçün sadəcə təqvim tarixi deyil, milli yaddaşın ən həssas və ehtiram dolu səhifəsidir. Xalqımız Ümummilli Lider Heydər Əliyevin anım gününü böyük el məhəbbəti, minnətdarlıq hissi və dövlətçilik təfəkkürü ilə qeyd edir. Tarixə öz adını əbədi həkk etmiş dahi şəxsiyyətin həyatı, siyasi irsi və fəaliyyəti bu gün də hər bir Azərbaycan vətəndaşı üçün qürur, güvən və nümunədir.
Dahi liderin xalqı ilə bağlılığı
Hər bir xalqın tarixi onun yetişdirdiyi böyük şəxsiyyətlərlə yadda qalır. Azərbaycan üçün bu şəxsiyyətlərin zirvəsində Heydər Əliyev dayanır. O, çətin və taleyüklü məqamlarda millətinə dayaq olmuş, xalqını arxasınca aparmış, dövlətçiliyimizin yenidən qurulması və möhkəmləndirilməsi yolunda misilsiz xidmətlər göstərmişdir.
Heydər Əliyevin Azərbaycan tarixində rolu yalnız siyasi idarəçiliklə məhdudlaşmır – onun fəaliyyəti milli oyanış, intibah, dirçəliş dövrünün təməl daşıdır. Ulu Öndərin rəhbərliyi illəri Azərbaycan üçün təhlükəsizlik, inkişaf, sabitlik və tərəqqi mərhələsi kimi yadda qalıb.
Dövlətçilik məktəbi və tarixi missiya
Ulu Öndərin dərin düşüncə tərzi, uzaqgörən qərarları, milli maraqlara əsaslanan siyasəti bu gün də dövlət idarəçiliyi üçün örnək sayılır. Onun imzaladığı mühüm fərmanlar, həyata keçirdiyi islahatlar, dövlətin müdafiə qabiliyyətinin gücləndirilməsi istiqamətində atdığı addımlar Azərbaycan dövlətçiliyinin əsas sütunlarını formalaşdırdı.
Heydər Əliyev milli sərhəd siyasətinin, təhlükəsizlik konsepsiyasının yaradılmasında mühüm xidmətlər göstərib. Zərgər dəqiqliyi ilə işlənmiş bu siyasət sonrakı illərdə ölkəmizin milli maraqlarının qorunmasına möhkəm zəmin hazırladı.
Siyasi xəttin davamı və Zəfərə aparan yol
Bu gün həmin siyasət Ulu Öndərin layiqli davamçısı – Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyev tərəfindən uğurla davam etdirilir. Məhz Heydər Əliyevin yaratdığı güclü dövlət institutları, formalaşdırdığı siyasi kurs 2020-ci ildə 44 günlük Vətən müharibəsində qazanılan tarixi qələbənin ideoloji və strateji əsasını təşkil edib.
Prezident İlham Əliyevin müdrikliyi, qətiyyəti və sərkərdəlik məharəti sayəsində Azərbaycan öz ərazi bütövlüyünü bərpa etdi, tarixdə misilsiz Zəfərə imza atdı. O, döyüş meydanında müzəffər lider, diplomatiyada böyük strateq, informasiya cəbhəsində Azərbaycanın haqq səsini dünyaya çatdıran qətiyyətli dövlət başçısı kimi çıxış etdi.
Birinci vitse-prezident Mehriban Əliyevanın humanitar sahədə gördüyü genişmiqyaslı işlər, milli-mənəvi dəyərlərin qorunması və sosial layihələrin icrasında oynadığı mühüm rol Heydər Əliyev ideyalarının bu gün də ölkənin inkişafına xidmət etdiyini təsdiqləyir.
Milli ehtiram günü
Ulu Öndər Heydər Əliyev uzunmüddətli müalicə aldığı ABŞ-ın Klivlend klinikasında 2003-cü il dekabrın 12-də dünyasını dəyişib. Həmin gündən etibarən bu tarix xalqımızın ümummilli ehtiram günü kimi qeyd olunur.
Hər il olduğu kimi, bu gün də ölkənin hər yerində anım mərasimləri keçirilir, Fəxri Xiyabana ziyarətlər təşkil olunur. Dövlət qurumları, ictimaiyyət nümayəndələri, gənclər və minlərlə vətəndaş Ulu Öndərin məzarı önünə gələrək onun xatirəsinə dərin hörmətlərini bildirirlər.
Əbədiyaşar lider
Heydər Əliyev Azərbaycan xalqının qəlbində yalnız siyasi lider kimi yox, eyni zamanda dövlətçiliyin memarı, müasir Azərbaycanın qurucusu, birlik və güc rəmzi kimi yaşayır. Onun ideyaları, prinsipləri, milli maraqları hər şeydən üstün tutan siyasi xətti bu gün də ölkəmizin inkişafına, güclənməsinə və beynəlxalq nüfuzunun artmasına xidmət edir.
Allah rəhmət eləsin! Ulu Öndərin xatirəsi xalqımızın yaddaşında daim yaşayacaq.
Afət Camalova,
Mehdiabad qəsəbə 3 nömrəli tam orta məktəbin direktoru
