Abşeron Rayon Ağsaqqallar Şurası 2025-ci il ərzində Azərbaycan Respublikasında həyata keçirilən dövlət siyasətinə uyğun olaraq milli-mənəvi dəyərlərin qorunması, ictimai həmrəyliyin möhkəmləndirilməsi, gənc nəslin vətənpərvərlik ruhunda tərbiyəsi və sosial təşəbbüslərin dəstəklənməsi istiqamətində məqsədyönlü və ardıcıl fəaliyyət göstərmişdir.
Hesabat dövründə Abşeron Rayon Ağsaqqallar Şurasının strukturunun gücləndirilməsi məqsədilə rayonun qəsəbə və kəndlərində ağsaqqallar şuralarının tərkibləri ilə görüşlər keçirilmiş, bir sıra yaşayış məntəqələrində yeni tərkiblər və sədr vəzifələri seçilmişdir. Bu tədbirlər yerli ağsaqqallar institutunun fəaliyyətinin daha səmərəli təşkilinə xidmət etmişdir.
2025-ci il ərzində Ümummilli Lider Heydər Əliyevin və görkəmli dövlət və ictimai xadimlərin xatirəsinə həsr olunmuş anım tədbirləri, Fəxri xiyabana ziyarətlər təşkil olunmuşdur. Zərifə Əliyevanın anım və doğum günləri, eləcə də Ulu Öndərin doğum və anım günləri münasibətilə keçirilən tədbirlər yüksək təşkilatçılıq səviyyəsində reallaşdırılmışdır.
May ayında Konstitusiyanın 30 illiyi və Vətən müharibəsində əldə olunmuş Qələbənin 5 illiyi münasibətilə Abşeron Rayon İcra Hakimiyyəti ilə birgə Heydər Əliyev Mərkəzində elmi-praktik konfrans keçirilmişdir. Dövlət əhəmiyyətli bayram və anım günləri – 28 May Müstəqillik Günü, 27 Sentyabr Anım Günü, 8 Noyabr Zəfər Bayramı və digər mühüm tarixlər münasibətilə silsilə tədbirlər təşkil edilmişdir.
Gənclərlə iş və maarifləndirmə fəaliyyəti hesabat dövründə əsas prioritetlərdən biri olmuşdur. Rayonun ümumtəhsil məktəblərində və peşə liseylərində şagirdlərlə keçirilən görüşlər zamanı milli-mənəvi dəyərlər, vətənpərvərlik, tarixi yaddaş və dövlətçilik ənənələri mövzularında maarifləndirici söhbətlər aparılmışdır.
Sosial yönümlü layihələr çərçivəsində ahıllara, şəhid ailələrinə və sosial həssas təbəqələrə diqqət və qayğı göstərilmiş, ağsaqqallar üçün pulsuz tibbi müayinələrin təşkili, imkansız ailələrə dəstək tədbirləri həyata keçirilmişdir. Eyni zamanda, rayon ərazisində sosial infrastrukturun yaxşılaşdırılması məqsədilə müvafiq dövlət qurumlarına rəsmi müraciətlər ünvanlanmışdır.
İlin yekununda Dünya Azərbaycanlılarının Həmrəyliyi Günü və Azərbaycan Respublikasının Prezidenti cənab İlham Əliyevin doğum günü münasibətilə Abşeron Rayon Ağsaqqallar Şurası adından rəsmi təbrik məktubu göndərilmişdir.
Abşeron Rayon Ağsaqqallar Şurası qarşıdakı dövrdə də cəmiyyətin rifahına, milli birliyin möhkəmləndirilməsinə və dövlətçilik dəyərlərinin təbliğinə yönəlmiş fəaliyyətini ardıcıl şəkildə davam etdirməyi qarşıya məqsəd qoyur.
Abşeron Rayov Ağsaqqallar Şurasının sədri,
şəhid Rauf İbadovun atası Məhərrəm İbadov
