Azərbaycan Respublikasının ratifikasiya etdiyi beynəlxalq sənədlərdə və milli qanunvericilik aktlarında əksini tapmış müddəalara uyğun olaraq, sosial xidmət sisteminin təkmilləşdirilməsi, əhalinin həssas qrupları üçün göstərilən xidmətlərin müasir tələblərə uyğunlaşdırılması və sosial müdafiə tədbirlərinin daha da gücləndirilməsi dövlət siyasətinin prioritet istiqamətlərindən biridir.
Bu məqsədlə hazırlanmış və Azərbaycan Respublikası Prezidentinin 28 avqust 2023-cü il tarixli 4059 nömrəli Sərəncamı ilə təsdiq edilmiş “Azərbaycan Respublikasında sosial xidmətin inkişafına dair 2023–2026-cı illər üçün Dövlət Proqramı”nda sosial xidmətlərin keyfiyyətinin və əhatə dairəsinin genişləndirilməsi, əhali üçün əlçatanlığının artırılması, eləcə də sosial səmərəlilik prinsiplərinin tətbiqi əsas hədəflər kimi müəyyən edilmişdir.
Dövlət Proqramının Tədbirlər Planının 8.4.3-cü bəndinin icrası ilə əlaqədar Abşeron Rayon İcra Hakimiyyətinin təşkilatçılığı ilə əhalinin sosial xidmətlərlə təmin edilməsində ünvanlılığın artırılması və mövcud sosial xidmətlər barədə məlumatlılığın yüksəldilməsi məqsədilə maarifləndirmə tədbiri keçirilmişdir.
Tədbir çərçivəsində Abşeron Rayon İcra Hakimiyyətinin könüllüləri tərəfindən rayonun müxtəlif ərazilərində, əhalinin sıx məskunlaşdığı məkanlarda sakinlərlə maarifləndirici söhbətlər aparılmış, sosial xidmətlərin növləri, onlardan istifadə qaydaları və müraciət mexanizmləri barədə ətraflı məlumat verilmişdir.
Eyni zamanda, vətəndaşların məlumatlandırılması məqsədilə Abşeron Rayon İcra Hakimiyyəti tərəfindən hazırlanmış maarifləndirici bukletlər paylanılmış, sosial xidmətlərin əlçatanlığının artırılması istiqamətində həyata keçirilən tədbirlərin əhəmiyyəti sakinlərin diqqətinə çatdırılmışdır.
