“Konstitusiya və Suverenlik İli” çərçivəsində 1 iyun – Uşaqların Beynəlxalq Müdafiəsi Günü ilə əlaqədar Abşeron rayonunda keçirilən bayram tədbirlərinin növbətisi Rayon Mərkəzi Xəstəxanasının təşkilatçılığı ilə Xırdalan Ailə Sağlamlıq Mərkəzində baş tutub.
Tədbirdə Ümummilli Lider Heydər Əliyevin və vətənimizin azadlığı uğrunda canından keçən şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Sözügedən tibb müəssəsinin xidmət göstərdiyi ərazi üzrə qeydiyyatda olan uşaqlar, onların valideynləri, o cümlədən şəhid və qazi ailələrinin övladları, fiziki, əqli məhdudiyyətli uşaqların da iştirak etdiyi tədbirdə çıxış edən Rayon Mərkəzi Xəstəxanasının İlkin səhiyyə xidməti üzrə direktor müavini Kazım Məmmədov və Xırdalan Ailə Sağlamlıq Mərkəzinin müdiri, həkim-pediatr Samirə Muxtarova Uşaqların Beynəlxalq Müdafiəsi Gününün tarixi barədə ətraflı məlumat verib, ölkəmizdə uşaqlara göstərilən diqqət və qayğıdan, onların sağlam mühitdə böyüməsi, tərbiyə alması üçün həyata keçirilən tədbirlərdən danışıblar.
Bildirilib ki, bütün sahələrdə olduğu kimi, əsası Ulu Öndər Heydər Əliyev tərəfindən qoyulmuş dövlət uşaq siyasəti bu gün möhtərəm Prezidentimiz İlham Əliyev və Azərbaycan Respublikasının Birinci vitse-prezidenti Mehriban Əliyeva tərəfindən çox uğurla davam etdirilir. Eyni zamanda, ölkəmizdə uşaq hüquqlarının qorunması istiqamətində həyata keçirilən çoxşaxəli təşəbbüslərin uğurla reallaşdırılmasında Heydər Əliyev Fondu böyük işlər görür.
Sonda uşaqlara hədiyələr təqdim edilib, xatirə şəkilləri çəkdirilib.
Qeyd edək ki, tədbir zamanı 360 uşaq tibbi müayinələrdən keçib.
