Xırdalan şəhər 17 saylı körpələr evi-uşaq bağçasında Novruz bayramı münasibətilə təntənəli tədbir keçirilib. Tədbir xalqımızın qədim tarixini, milli adət və ənənələrini körpə fidanlara daha yaxından tanıtmaq, təbliğ etmək məqsədilə təşkil edilib.
Şənliyin aparıçısı əcdadlarımızdan bizə yadigar qalan, milli ruhumuzu və yaddaşımızı bütün zənginliyi ilə özündə əks etdirən Novruz bayramı münasibətilə iştirakçıları təbrik edib, Novruz bayramının tarixi əhəmiyyəti barədə danışıb. Bildirilib ki, zəngin mənəvi dəyərlərimizə söykənərək insanlar arasında qarşılıqlı hörmət, səmimiyyət və mehribanlıq münasibətlərini bərqərar edən Novruz bayramı xalqda gələcəyə nikbinliklə, ümidlə baxmaq hissləri doğurur.
Bayram şənliyində Novruz personajları olan Keçəl və Kosanın məzəli oyunları, tədbir iştirakçılarının marağına səbəb olub.
Tədbirdə bağçanın balaca sakinləri baharın təravətli nəfəsini özü ilə gətirən Novruz bayramına aid mahnılar oxuyub, şeirlər səsləndirib, maraqlı səhnəciklər göstərib, yallı gedib və digər bacarıqlarını nümayiş etdiriblər.