Aprel döyüşlərinin üçünçü ildönümü ilə əlaqədar “Aşıq Şəmşir” Mədəniyyət Ocağı İctimai Birliyinin və Xırdalan şəhər 2 nömrəli tam orta məktəbin birgə təşkilatçılığı ilə “Aprel zəfəri - 2016” adlı tədbir keçirilib.
Xırdalan şəhər 2 nömrəli tam orta məktəbdə baş tutan tədbiri giriş sözü ilə açan məktəbin direktoru Ədalət Camalova Aprel döyüşlərində Azərbaycan Milli Ordusunun qazandığı zəfərdən danışıb. Bildirib ki, ordumuz bu döyüşlərdə tarixi ərazilərimizin işğaldan azad edilməsi üçün hər cür fədakarlığa və hərbi qüdrətə qadir olduğunu sübut edib.
Ə. Camalova qeyd edib ki, aprel döyüşləri həm də onu göstərdi ki, Azərbaycanın güclü ordusu var: "Aprel döyüşləri həm ermənilərə, həm də beynəlxalq aləmə göstərdi ki, Azərbaycan gəncləri hər zaman Qarabağ uğrunda döyüşə hazırdır. Ali Baş Komandanın rəhbərliyi ilə işğalda olan torpaqlarımızı tezliklə azad edəcəyik".
Digər çıxış edənlər söyləyiblər ki, qazanılan qələbə sayəsində “Böyük qayıdış” prosesi başlayıb. Lələtəpə yüksəkliyinin azad edilməsi ilə Cəbrayıl rayonunun Cocuq Mərcanlı kəndinin əhalisi öz doğma ocağına qayıdıb.
Tədbirdə şagirdlərin hazırladığı “Şəhidlər ölməz, vətən bölünməz” ədəbi-bədi kompozisiyası nümayiş olunub.
Tural Kazımlı