Məmmədli kənd 10 saylı körpələr evi-uşaq bağçasında keçirilən məşğələdə körpə fidanlara bağçanın tərbiyyəçi müəlliməsi Güləsər Məmmədova tərəfindən “Ev heyvanları” tədris edilib. Abşeron rayon İcra Hakimiyyətinin fəaliyyət planına əsasən təşkil edilmiş açıq məşğələdə Abşeron RİH-in əməkdaşı Seymur Qasımov, rayon ərazisində yerləşən məktəbəqədər təhsil müəssisələrinin tərbiyəçiləri və bağçanın kollektivi iştirak ediblər.
Əvvəlcə uşaqlar tərbiyəçinin “Ev heyvanları” haqqında verdiyi sualları cavablandıraraq biliklərini nümayiş etdiriblər.
G.Məmmədova məşğələdə yeni təlim üsullarından və əyani vasitələrdən istifadə etdib. Körpələr qrupunda açıq məşğələ zamanı yeni mövzunun öyrənilməsi üçün motivasiya qurulub, uşaqlara qrup işində düşündürücü suallar verilib. Uşaqlar məşğələ zamanı həm öyrənib, həm də əyləniblər.
Qruplar öz işlərini təqdim etdikdən sonra tərbiyəçi müəllim tərəfindən onların işi müzakirə olunub.
Məşğələdən sonra onun təhlili aparılıb.
Abşeron rayon İcra Hakimiyyətinin başçısı İradə Gülməmmədovanın məktəbəqədər təhsilə göstərdiyi qayğı nəticəsində əldə edilən nailiyyətlərdən, körpə fidanların hərtərəfli inkişafı ilə əlaqədar həyata keçirilən uğurlu layihələrdən bəhs edən S.Qasımov bildirib ki, rayonda son illər ərzində 50-dən çox müasir tipli məktəb və bağça tikilib istifadəyə verilib.
Bağçanın müdirəsi Vəfa Rəsulova çıxışında "açıq məşğələ"nin yaxşı keçdiyini vurğulayıb. Bildirilib ki, bağçada uşaqlara canlı və cansız aləmlə tanışlıq, təbiətin qanunauyğunluqlarını başa salmaqla yanaşı, onlarda vətənpərvərlik, canıyananlıq, mehribanlıq, tapşırıqlara əməl etmək, təmizkarlıq, qətiyyətlilik, doğruçuluq, dostluq, yoldaşlıq kimi mənəvi-əxlaqi keyfiyyətlərin formalaşdırılması istiqamətində ardıcıl iş aparılır.
Turak Kazımlı