Bakı Dövlət İqtisadiyyat və Humanitar Kollecində İmadəddin Nəsiminin 650 illik yubileyi münasibətilə tədbir keçirilib.Yubiley tədbirində kollecin rəhbərliyi, tələbə-müəllim heyəti ilə yanaşı Abşeron RİH-nin əməkdaşları və Rayon Gənclər İdman İdarəsinin rəisi iştirak edib.
Tədbiri giriş sözü ilə açan ədəbiyyat müəllimi Pərvin Məmmədli 2019-cu ilin Azərbaycanda “Nəsimi ili” elan olunduğunu və dahi şairin 650 illik yubileyinin dövlət səviyyəsində keçirildiyini qeyd edib. O bildirib ki, Şərq xalqlarının mədəni sərvətlər xəzinəsində özünəməxsus layiqli yer tutan Nəsimi yaradıcılığı uzun illərdən bəri elmi-ədəbi fikrin diqqət mərkəzindədir.
Sonra tərbiyə işləri üzrə direktor müavini Gülnarə Həsənova Prezident İlham Əliyevin böyük Azərbaycan şairi İmadəddin Nəsiminin 650 illik yubileyinin qeyd edilməsi və 2019-cu ilin “Nəsimi ili” elan edilməsi haqqında sərəncamlarına uyğun olaraq ölkəmizdə və ölkəmizdən kənarda silsilə tədbirlərin, təqdimatların keçirilməsinin, şairin ədəbi irsinin yenidən öyrənilərək dünya ictimaiyyətinə çatdırılmasının əhəmiyyətini vurğulayıb.
Qeyd edilib ki, mütəfəkkir şair İmadəddin Nəsiminin 650 illik yubileyi ilə əlaqədar olaraq Azərbaycan Respublikasının Birinci vitse-prezidenti Mehriban Əliyeva bir gündə 650 min ağacın əkilməsi təşəbbüsünü irəli sürüb. Bu genişmiqyaslı kampaniya respublikada böyük rəğbətlə qarşılanıb. Aksiya çərçivəsində Abşeron rayonunda da 22 min ağac əkilib.
Daha sonra mütəfəkkirin həyat və yaradıcılığından bəhs edən videoçarx nümayiş etdirilib.
Tədbirdə Bakı Dövlət İqtisadiyyat və Humanitar Kollecinin tələbələri böyük şairin qəzəllərini, Təhsil Alan Gənclərin Respublika Bədii Yaradıcılıq Evinin özfəaliyyət kollektivinin üzvləri Nəsiminin qəzəlləri üstə muğam parçaları ifa ediblər.
228
0
112
0
