“Xeberaz.az” saytı tərəfindən hazırlanan “Prezident qanunsuz tikililərə dair tapşırıq verdi” videoreportajda “KİV haqqında” qanunun tələbləri açıq-aşkar və məqsədli şəkildə pozulub. Əvvəlcə onu qeyd etmək lazımdır ki, videoreportajda sözügedən obyekt Abşeron rayonunda deyil, Binəqədi rayonunun inzibati ərazisinə daxildir. Yəni “jurnalist” bu faktı araşdırmadan və ya bilərəkdən məqsədli şəkildə Abşeron RİH-nin adını çəkərək qurumun işgüzar nüfuzuna ziyan vurmağa çalışır. Digər tərəfdən məsələ ilə bağlı, adıçəkilən tərəf kimi, Abşeron Rayon İcra Hakimiyyətindən münasibət öyrənmədən reportajı yayımlayır. Bu da daha çox “reket jurnalistikası”na xas olan xüsusiyyətdir. Reportajın elə ilk dəqiqələrindən hiss olunur ki, burada məqsəd həqiqi araşdırma aparmaq deyil, qarayaxma kampaniyası həyata keçirməklə müəyyən maraqlara nail olmaqdır. “KİV haqqında” qanunun tələblərini görməzdən gəlmək, qaralamağa çalışdığın qurumdan isə qanun tələb etmək yalnız riyakarların seçimi ola bilər.
Onu da xüsusi şəkildə qeyd etmək yerinə düşər ki, “Xeberaz.az” saytı tərəfindən hazırlanan videoreportajda yeni tikilməkdə olan obyektdə çalışan işçilərin əmək müqaviləsinin olmadığı vurğulanır və buna Abşeron Rayon İcra Hakimiyyətinin nəzarət etməli olduğu önə çəkir. Öncə xatırlatmaq lazımdır ki, Azərbaycan qanunvericiliyənə görə əmək münasibətlərinə yerli icra hakimiyyətləri deyil, Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidməti tərəfindən nəzarət olunur. Özünü “jurnalist” adlandıran şəxslər üçün isə bunu araşdırmaq, qanunvericiliyi öyrənmək əsas deyil, onlar üçün əsas qarayaxma kampaniyası aparmaqla güddüyü çirkin maraqlara nail olmaqdır.
