Abşeron rayonunda fəaliyyət göstərən təhsil müəssisələrində 1 İyun – Uşaqların Beynəlxalq Müdafiəsi Günü münasibətilə silsilə tədbirlər təşkil olunub.
Belə tədbirlərdən biri Saray qəsəbə 4 nömrəli tam orta məktəbdə keçirilib. Təhsil müəssisəsində əlamətdar günə həsr olunmuş mühazirələr, seminarlar, konfranslar, dəyirmi masalar, fləşmoblar və idman yarışları təşkil edilib. Tədbirlərin əsas məqsədi uşaqların hüquqlarının müdafiəsi, onların hərtərəfli inkişafının təşviqi və cəmiyyətin diqqətinin bir daha bu vacib məsələyə yönəldilməsi olub.
Tədbirlərdə çıxış edənlər 1 İyun – Uşaqların Beynəlxalq Müdafiəsi Gününün tarixi və əhəmiyyəti barədə ətraflı məlumat veriblər. Qeyd olunub ki, bu gün uşaqların hüquqlarının qorunması, onların rifahının yaxşılaşdırılması və problemlərinin həllinə diqqətin artırılması məqsədilə dünyanın bir çox ölkələrində qeyd edilir.
Çıxışlarda ölkəmizdə uşaqlara göstərilən dövlət qayğısından, onların sosial müdafiəsinin gücləndirilməsi, keyfiyyətli təhsil və səhiyyə xidmətləri ilə təmin olunması istiqamətində həyata keçirilən ardıcıl tədbirlərdən bəhs edilib. Vurğulanıb ki, gələcəyimiz olan uşaqların sağlam, savadlı və vətənpərvər ruhda böyüməsi dövlət siyasətinin əsas prioritet istiqamətlərindən biridir.
Bildirilib ki, əsası Ümummilli Lider Heydər Əliyev tərəfindən qoyulan uşaq-gənclər siyasəti Azərbaycan Respublikasının Prezidenti cənab İlham Əliyev tərəfindən uğurla davam etdirilir. Bu siyasətin nəticəsi olaraq ölkəmizdə uşaqların hüquqlarının müdafiəsi, onların təhsil alması və hərtərəfli inkişafı üçün geniş imkanlar yaradılıb. Eyni zamanda şəhid ailələrinin övladları və Vətən uğrunda canından keçmiş qəhrəmanlarımızın yadigarları da dövlətin xüsusi diqqət və qayğısı ilə əhatə olunub.
Tədbirdə qeyd olunub ki, Birinci vitse-prezident Mehriban xanım Əliyevanın təşəbbüsü və dəstəyi ilə uşaqların yüksək standartlara uyğun təhsil və tibbi xidmətlərlə təmin olunması istiqamətində mühüm layihələr həyata keçirilir. Həmçinin Heydər Əliyev Fondu tərəfindən uşaqların sağlam və savadlı yetişməsi, onların bilik və bacarıqlarının inkişaf etdirilməsi məqsədilə müxtəlif sosial, təhsil və humanitar proqramlar uğurla icra olunur.
Sonda tədbir iştirakçıları uşaqların cəmiyyətin ən dəyərli sərvəti olduğunu vurğulayaraq, onların bilikli, sağlam və vətənpərvər ruhda yetişməsinin ölkənin gələcək inkişafı üçün mühüm əhəmiyyət daşıdığını qeyd ediblər.
