Dövlətçilik tariximizin ən şanlı səhifələrindən birini təşkil edən 15 İyun – Milli Qurtuluş Günü müasir Azərbaycanın müstəqillik və inkişaf xəttinin başlanğıc nöqtəsi hesab olunur. Ümummilli Lider Heydər Əliyevin 1993-cü ildə xalqın təkidli tələbi ilə yenidən siyasi hakimiyyətə qayıdışı ölkəni parçalanmaqdan, daxili və xarici təhdidlərdən xilas edərək bugünkü qüdrətli Azərbaycanın təməllərini qoymuşdur. Bu tarixi hadisə sadəcə hakimiyyət dəyişikliyi deyil, eyni zamanda milli dövlətçilik ideologiyasının bərqərar olması və gələcək böyük qələbələrin rəmzidir.
Xatırladaq ki, Ulu Öndər Heydər Əliyevin 1987-ci ildə Sovet İttifaqı rəhbərliyinin yeritdiyi ədalətsiz siyasi xəttə etiraz edərək istefa verməsindən sonra ölkədə dərin böhran dalğası başlamışdı. Onun gedişindən dərhal sonra erməni millətçilərinin Qarabağla bağlı qaldırdığı əsassız iddialar Azərbaycan xalqını ağır faciələrlə üz-üzə qoydu. Müstəqilliyin ilk illərində, xüsusilə AXC-Müsavat hakimiyyəti dövründə idarəçilikdəki səriştəsizlik, dövlət əmlakının mənimsənilməsi, kütləvi xaos, daxili çəkişmələr və kriminal qüvvələrin ön plana çıxması ölkəni vətəndaş müharibəsi həddinə çatdırmışdı. Belə bir çətin şəraitdə xalq yeganə ümid və çıxış yolunu Naxçıvandan başlayan xilaskarlıq missiyasında – Heydər Əliyevin böyük siyasi təcrübəsində görürdü.
1993-cü il iyunun 15-də Heydər Əliyevin Azərbaycan Ali Sovetinin sədri seçilməsi ilə ölkədə xaos dövrünə son qoyuldu, ictimai-siyasi sabitliyin təmin olunması istiqamətində qətiyyətli addımlar atıldı. Həmin il keçirilən prezident seçkilərində xalqın mütləq əksəriyyətinin səsini qazanaraq dövlət başçısı seçilən Ümummilli Lider andiçmə mərasimində ömrünün qalan hissəsini yalnız Azərbaycanın müstəqil bir dövlət kimi inkişafına həsr edəcəyini bəyan etdi. Tezliklə ölkədə atəşkəs imzalandı, nizami ordu quruculuğuna start verildi, iqtisadi islahatların və qlobal enerji layihələrinin təməli qoyuldu. Azərbaycan təcrid olunmuş vəziyyətdən çıxaraq beynəlxalq aləmdə öz prinsipial və nüfuzlu mövqeyini nümayiş etdirməyə başladı.
Ulu Öndərin ən böyük və müqəddəs arzusu isə Azərbaycanın ərazi bütövlüyünü tam bərpa etmək, işğal altındakı torpaqları, xüsusilə mədəniyyətimizin rəmzi olan Şuşanı azad görmək idi. Heydər Əliyev məcburi köçkünlərlə hər görüşündə bu torpaqlara mütləq qayıdacağımıza dair sarsılmaz inamını ifadə edirdi. Bu gün həmin uzaqgörən və səmərəli daxili-xarici siyasət kursu Prezident İlham Əliyev tərəfindən böyük uğurla davam etdirilir. Müzəffər Ali Baş Komandanın rəhbərliyi ilə Azərbaycan həm döyüş meydanında, həm də daxili və xarici siyasətdə öz müstəqil iradəsini və gücünü bütün dünyaya sübut edərək Ulu Öndərin vəsiyyətini və xalqımızın çoxillik torpaq həsrətini reallığa çevirdi.
Azərbaycan xalqı dövlətimizi dərin böhrandan qurtararaq bu günlərə çatdıran dahi lider Heydər Əliyevin əziz xatirəsini hər zaman ən uca zirvədə tutur.
Mahnur Hüseynova,
Xırdalan şəhər 8 nömrəli tam orta ümumtəhsil məktəbinin direktoru
