Abşeron rayonunun Qobu qəsəbəsində fəaliyyət göstərən xalçaçılıq emalatxanası uzun illərin təcrübəsini və milli irsi özündə birləşdirən mühüm mərkəzlərdən biri kimi diqqət çəkir. Burada çalışan təcrübəli sənətkarlar – Rəfiqə Bəşirova və Firəngiz Orucova Azərbaycanın qədim xalçaçılıq ənənələrinin qorunub saxlanılmasında xüsusi rol oynayırlar.
Hər iki sənətkar 40 ilə yaxındır ki, xalçaçılıqla məşğuldur. Onlar bu sənətə hələ 17 yaşlarında yiyələnərək, illər ərzində zəngin təcrübə toplayıblar. Hazırda 68 yaşlı Rəfiqə Bəşirova və 66 yaşlı Firəngiz Orucova 2014-cü ildən fəaliyyət göstərən Qobu Mədəniyyət evinin nəzdindəki emalatxanada çalışırlar.
Qobulu ustalar yalnız yerli səviyyədə deyil, beynəlxalq arenada da ölkəmizi uğurla təmsil ediblər. Onların əl işləri Türkiyə, Əlcəzair və Dağıstanda keçirilən sərgilərdə nümayiş olunub və böyük maraqla qarşılanıb. Bu xidmətlərinə görə hər iki sənətkara 2016-cı ildə “Əməkdar mədəniyyət işçisi” fəxri adı verilib.
Rəfiqə Bəşirovanın peşəkar fəaliyyəti xüsusilə diqqətəlayiqdir. O, uzun illər Qaradağ rayonunda çalışıb, Quba bölgəsində fəaliyyət göstərib, həmçinin 6 ilə yaxın “Azərxalça” ASC-nin Abşeron filialına rəhbərlik edib. Bu dövrdə o, xalçaçılıq sənətinin inkişafına mühüm töhfələr verib.
Ustalar əsasən Azərbaycanın müxtəlif xalçaçılıq məktəblərinə aid nümunələr üzərində çalışırlar. Onların toxuduqları xalçalar arasında Bakı, Qarabağ, Şirvan və Quba qruplarına aid nadir nümunələr yer alır. Xüsusilə Bakı qrupuna aid Suraxanı, Xiləfşan, Görədil və Fatmayı çeşniləri onların yaradıcılığında geniş yer tutur.
Bununla yanaşı, Rəfiqə Bəşirova və Firəngiz Orucova gənc nəslin bu sənətə marağının artırılmasında da fəal iştirak edirlər. Qobu, Hökməli, Qaradağ və Lökbatan ərazilərində yaşayan yeniyetmə və gənclərin xalçaçılıq sənətini öyrənməsində onların əməyi böyükdür.
Bu gün Qobuda fəaliyyət göstərən emalatxana yalnız istehsal məkanı deyil, həm də milli-mədəni irsin yaşadıldığı və gələcək nəsillərə ötürüldüyü bir məktəb rolunu oynayır.
