Xırdalan bələdiyyəsinin Avropa Birliyinin və Göte İnstitutunun birgə dəstəyi ilə həyata keçirdiyi "EU4 Culture - Şərq Tərəfdaşlığı ölkələrində Mədəni İnkişaf Strategiyalarının Hazırlanmasında qeyri-paytaxt şəhər və rayonlarına dəstək" layihəsi çərçivəsində yerli diyarşünaslıq muzeyinin fəaliyyətində yeni yanaşmanın tədbiqi də yer alıb. Burada məqsəd tarixi yaddaşı şəxsi kolleksiyalarda qorunub saxlanılan dəyərli əşya və sənədləri aşkara çıxartmaq, insanların xatirələrini canlandırmaq vasitəsilə yerli əhali ilə daha sıx ünsiyyət yaratmaqdır.
Bu metodun uğurlu nümunəsi olan diyarşünas tədqiqatçı, qədim və müasir tarixi əşyalar və müasir incəsənət kolleksioneri Səyavuş Əlizadənin Şağan kəndində təsis etdiyi Sevda Abdullayeva adına “Xəzər” Muzey Mərkəzidir.
Adıçəkilən layihə çərçivəsində Abşeron rayonunun mədəniyyət işçilərinin bir qrupu üçün üçün Şağan kəndinə “Əşyaların yaddaşı” adlı ekskursiya təşkil olunub.
Qonaqlar öncə “Xəzər” Muzey Mərkəzi ilə tanış olub, sonra isə təsisçinin 22 il ərzində topladığı 10 mindən çox eksponat arasından rəmzi olaraq seçilən 22 eksponatın tarixçəsi haqqında onlara məlumatlar təqdim edilib.
Qeyd edək ki, gələcəkdə Xırdalan şəhərində yerləşən Abşeron rayon Tarix-Diyarşünaslıq muzeyində yerli sakinlərin yaxından iştirakı ilə ətraf kənd və qəsəbələrin tarix və mədəniyyətinə aid xüsusi ekspozisiyaların tərtib edilməsi planlaşdırılır.
