2026-cı ilin ölkədə “Şəhərsalma və Memarlıq İli” elan olunması Azərbaycanın inkişaf strategiyasında keyfiyyətcə yeni mərhələnin başlandığını göstərir. Bu qərar yalnız şəhərlərin xarici görünüşünün dəyişdirilməsi ilə məhdudlaşmır, daha geniş mənada insan həyatının bütün istiqamətlərini əhatə edən müasir və dayanıqlı mühitin formalaşdırılmasına xidmət edir. Artıq şəhərsalma anlayışı təkcə tikinti və memarlıqla deyil, sosial rifah, təhlükəsizlik, ekoloji tarazlıq və keyfiyyətli təhsil kimi mühüm komponentlərlə sıx bağlı şəkildə inkişaf edir.
Azərbaycanda həyata keçirilən bu yanaşmanın əsasında uzun illər əvvəl müəyyənləşdirilmiş dövlətçilik prinsipləri dayanır. İnsan kapitalının inkişafı, xüsusilə təhsilin prioritet istiqamət kimi müəyyən edilməsi bu siyasətin əsas sütunlarından biridir. Bu gün həmin xətt müasir çağırışlara uyğun şəkildə davam etdirilərək təhsil sahəsində genişmiqyaslı yenilənmələrə səbəb olub. Yeni məktəblərin tikintisi, mövcud təhsil müəssisələrinin əsaslı şəkildə yenidən qurulması və onların müasir texnologiyalarla təmin edilməsi gənc nəslin daha keyfiyyətli təhsil almasına real imkanlar yaradır.
Son illərdə ölkə üzrə həyata keçirilən layihələr nəticəsində təhsil infrastrukturu əhəmiyyətli dərəcədə güclənib. Müasir məktəb binaları yalnız tədris məkanı deyil, eyni zamanda şagirdlərin hərtərəfli inkişafını təmin edən kompleks mühit kimi formalaşdırılır. Bu prosesdə sosial və humanitar təşəbbüslərin də xüsusi rolu var. Reallaşdırılan layihələr təhsilin əlçatanlığını artırmaqla yanaşı, onun keyfiyyət göstəricilərini də yüksəldir və cəmiyyətin bütün təbəqələrini əhatə edir.
Regionlarda, o cümlədən Abşeron rayonunda aparılan yenidənqurma işləri bu siyasətin real nəticələrini aydın şəkildə nümayiş etdirir. Xırdalan, Mehdiabad, Masazır, Hökməli və Saray kimi yaşayış məntəqələrində müasir məktəblərin istifadəyə verilməsi minlərlə şagird üçün daha rahat və texnoloji imkanlarla zəngin təhsil mühiti yaradıb. Bununla yanaşı, 2025-ci il ərzində Abşeron rayonu və ətraf ərazilərdə təhsil infrastrukturunun inkişafı istiqamətində genişmiqyaslı layihələr icra olunub. İl ərzində bölgədə 3 yeni tam orta məktəb tikilərək istifadəyə verilib, 3 məktəb isə əsaslı təmir və yenidənqurmadan sonra yenilənmiş şəkildə fəaliyyətə başlayıb. Bu addımlar artan şagird sayına uyğun olaraq mövcud sıxlığın azaldılmasına, tədris prosesinin daha səmərəli təşkilinə və şagirdlər üçün təhlükəsiz, komfortlu mühitin yaradılmasına mühüm töhfə verib.
İşğaldan azad olunmuş ərazilərdə həyata keçirilən genişmiqyaslı quruculuq işləri isə bu yanaşmanın daha sistemli və gələcəyə hesablanmış xarakter daşıdığını göstərir. Burada inşa olunan yeni yaşayış məntəqələri və təhsil müəssisələri müasir şəhərsalma prinsipləri əsasında planlaşdırılır, dayanıqlı inkişaf modeli tətbiq edilir. Bu isə yalnız bərpa deyil, həm də keyfiyyətcə daha yüksək səviyyəli həyat mühitinin qurulması deməkdir.
Beləliklə, şəhərsalma siyasəti ilə təhsil sahəsinin paralel inkişafı Azərbaycanda məqsədyönlü və uzunmüddətli strategiyanın tərkib hissəsinə çevrilib. Bu vəhdət həm urbanistik mühitin müasirləşdirilməsinə, həm də cəmiyyətin intellektual potensialının gücləndirilməsinə xidmət edir. Formalaşan yeni reallıq göstərir ki, həyata keçirilən ardıcıl siyasət nəticəsində ölkədə yaradılan müasir yaşayış və təhsil mühiti gələcək nəsillərin daha sağlam, təhlükəsiz və yüksək dünyagörüşlü şəkildə yetişməsi üçün möhkəm zəmin yaradır. Bu istiqamətdə atılan addımlar Azərbaycanın davamlı inkişafının əsas təminatlarından biri kimi öz əhəmiyyətini daha da artırır.
Afət Camalova,
Mehdiabad qəsəbə 3 nömrəli tam orta məktəbin direktoru
