Abşeron rayonunda 1 iyun - Uşaqların Beynəlxalq Müdafiəsi Günü münasibəti ilə silsilə bayram tədbirləri keçirilib. Abşeron RİH-nin, Abşeron-Xızı Regional Mədəniyyət İdarəsi və Abşeron-Xızı Regional Təhsil İdarəsinin birgə təşkilatçılığı ilə keçirilən tədbirlərdə Rayon İcra Hakimiyyətinin rəhbər işçiləri, YAP Abşeron Rayon Təşkilatının sədri, qəhrəman oğullarımızın yadigar övladları, rayon Ağsaqallar Şurasının, eləcə də Abşeron RİH yanında İctimai Şuranın sədri, şəhid ailələri, regional mədəniyyət, təhsil, idman idarələrinin məsul şəxsləri iştirak ediblər.
İştirakçılar əvvəlcə Xırdalan şəhərində Ümummilli Lider Heydər Əliyev adına Parkda Ulu Öndərin abidəsini ziyarət ediib, önünə tər çiçəklər düzərək xatirəsini ehtiramla yad ediblər.
Sonra Abşeron Mədəniyyət Mərkəzində davam etdirilən tədbirdə Ümummilli Lider Heydər Əliyevin və vətənimizin azadlığı uğrunda canından keçən şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.
Tədbirdə Abşeron RİH başçısının müavini, İctimai-siyasi və humanitar məsələlər şöbəsinin müdiri Gülnar Rəhimova çıxış edərək bildirib ki, əsası Ümummilli Lider Heydər Əliyev tərəfindən qoyulan uşaq və gənclər siyasəti sayəsində ölkəmizdə bu istiqamətdə olduqca əhəmiyyətli dövlət proqramları, o cümlədən qərarlar qəbul olunub. Uşaqların yaxşı təhsil və təlim-tərbiyə alması, Vətən və xalq üçün gərəkli övlad kimi yetişməsi Ulu Öndər Heydər Əliyevin daim diqqətində olduğunu vurğulayan G.Rəhimova bu siyasətin bu gün də Azərbaycan Respublikasının Prezidenti cənab İlham Əliyev tərəfindən uğurla davam etdirildiyini vurğulayıb. O qeyd edib ki, Birinci vitse-prezident Mehriban xanım Əliyeva tərəfindən daima uşaqların inkişafına xüsusi diqqət yetirilib və bu istiqamətdə Heydər Əliyev Fondu tərəfindən çoxsaylı və çoxşaxəli layihələr icra olunub.
Sonra Abşeron RİH-i yanında İctimai Şuraının sədri, şəhid Elçin Həsənlinin anası Xatirə İsmayılova, Abşeron-Xızı Regional Mədəniyyət İdarəsinin baş məsləhətçisi, Abşeron rayonu üzrə nümayəndəsi, aprel şəhidi Əbdülməcid Axundovun anası Ceyran Həsənova və şəhid Rauf İbadovun atası, Abşeron Rayon Ağsaqqallar Şurasının sədri Məhərrəm İbadov çıxış edərək bildiriblər ki, hər zaman sonsuz sevgi, minnətdarlıq və qürurla xatırladığımız müstəqil Azərbaycan dövlətinin qurucusu Heydər Əliyev daim uşaqlara böyük qayğı və diqqət göstərib, onların ən böyük himayədarı olub. Ümummilli Liderin ölkəmizə rəhbərlik etdiyi dövrdə bütün sahələrdə olduğu kimi, uşaq hüquqlarının qorunması, uşaqların sosial müdafiəsinin gücləndirilməsi ilə bağlı genişmiqyaslı işlər görülüb, müvafiq qanunvericilik aktları qəbul edilib. Bu gün də müzəffər Ali Baş Komandan cənab İlham Əliyevin rəhbərliyi altında müstəqil, suveren və ərazi bütövlüyü tam bərpa olunan qalib ölkəmizdə uşaqlarımız tam təhlükəsiz və azad şəkildə yaşayaır, dövlətimizə, vətənimizə sevgi ruhunda böyüyürlər.
Rayon ərazisində fəaliyyət göstərən körpələr evi-uşaq bağçalarında tərbiyə alan uşaqlar, o cümlədən ümumtəhsil məktəblərinin şagirdləri tərəfindən hazırlanan konsert proqramı, eyni zamanda Abşeron-Xızı Regional Mədəniyyət İdarəsi tərəfindən hazırlanmış “Tıq-tıq xanım” tamaşası nümayiş olunub.
