Abşeron rayonunda 15 iyun – Milli Qurtuluş Gününə həsr olunan tədbir keçirilib. Rayon İcra Hakimiyyətinin təşkilatçılığı ilə Xırdalan şəhəri, Heydər Əliyev Mərkəzində keçirilən tədbirdə RİH başçısı Abdin Fərzəliyev, regional idarə rəhbərləri, YAP Abşeron rayon təşkilatının sədri Abbas Əliyev, Abşeron RİH yanında İctimai Şuranın sədri, Vətən Müharibəsi şəhidi Elçin Həsənlinin anası Xatirə İsmayılova, Abşeron Ağsaqqallar Şurasının sədri, şəhid Rauf İbadovun atası Məhərrəm İbadov, hüquq mühafizə orqanları, idarə və təşkilat rəhbərləri, şəhid ailələri, müharibə iştirakçıları və rayon ictimaiyyəti iştirak edib.
İştirakçılar əvvəlcə Ümummilli Lider Heydər Əliyevin abidəsi önünə güllər düzərək Ulu Öndərin əziz xatirəsini dərin ehtiramla yad ediblər.
Sonra Heydər Əliyev Mərkəzində davam etdirilən tədbirdə Dövlət Himni oxunub, Ulu Öndər Heydər Əliyevin, vətənimizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Daha sonra xalqımızın Ümummilli Lideri Heydər Əliyevin şərəfli həyatına və əzmkar fəaliyyətinə - xatirəsinə həsr olunmuş videoçarx nümayiş olunub.
Tədbirdə çıxış edən Abşeron Rayon İcra Hakimiyyətinin başçısı Abdin Fərzəliyev bildirib ki, Ümummilli Lider Heydər Əliyevin Azərbaycan xalqını dövrünün siyasi və keşməkeşli proseslərindən necə xilas etdiyi, vətənimiz, millətimiz üçün nə qədər böyük işlər gördüyü zaman ötdükcə daha çox dərk olunur. Qeyd edilib ki, dünyanın bugünki siyasi gündəminə baxdıqda, beynəlxalq aləmdə cərəyan edən qeyri-sabitliyi müşahidə etdikcə müasir Azərbaycanın belə müvəffəqiyyətli gələcəyə çatması üçün Ulu Öndərin vaxtında həyata keçirdiyi uğurlu siyasətin müstəsna əhəmiyyətlərini qeyd etməmək olmaz. Azərbaycanın bu günə qədər əldə etdiyi bütün nailiyyətlər Ümummilli Lider Heydər Əliyevin adı ilə bağlıdır. Bildirilib ki, Heydər Əliyev siyasi fəaliyyətinin bütün mərhələlərində vətənə, xalqa, torpağa sonsuz məhəbbət və sədaqət hissi ilə, qurub-yaratmaq amalı ilə yanaşmış, hər zaman milli dəyərlərə bağlı olmuşdur. Ümummilli Lider Heydər Əliyevin fəaliyyəti nəticəsində ölkəmizdə yaşanan intibahdan, respublikamızda geniş vüsət alan hərtərəfli inkişafdan danışan RİH başçısı Ulu Öndərin milli ruhun dirçəldilməsində, dövlətçilik ənənələlərinin qorunub saxlanılmasındakı xüsusi xidmətlərindən söz açıb. Bildirilib ki, bütün həyatı və fəaliyyəti boyunca daima vətənini, onun suverenliyini, dövlətimizin güclənməsini düşünən Heydər Əliyev Azərbaycanın ən çətin məqamlarında onu üzləşdiyi faciələrdən, çətinliklərdən, bir dövlət kimi məhv olmaq təhlükələrindən xilas etmək üçün misilsiz xidmətlər göstərmişdir. Bu gün də Ümummilli Lider Heydər Əliyevin müəyyənləşdirdiyi siyasi kursu uğurla davam etdirən Azərbaycan Respublikasının Prerzidenti cənab İlham Əliyev vətənimizin ərazi bütövlüyünü təmin etmiş, Müzəffər Ali Baş Komandanın “Dəmir yumruğ”u ətrafında birləşən ordumuz Vətən Müharibəsində düşmən üzərində şanlı qələbə qazanmış və bununla da ata nəsihəti yerinə yetirilmişdir.
Sonra YAP Abşeron rayon təşkilatının sədri Abbas Əliyev, Abşeron-Xızı Regional Maliyyə İdarəsinin rəisi Bəhruz Məmmədov, şəhid Əbdülməcid Axundovun anası, Abşeron-Xızı Regional Mədəniyyət İdarəsinin Abşeron rayon üzrə nümayəndəsi Ceyran Həsənova çıxış edərək Ulu Öndərin Azərbaycan xalqının taleyində misilsiz rol oynadığını, dahi şəxsiyyətin hər zaman qürur və iftixar hissi ilə xatırlandığını və yad edildiyini bildiriblər.
Daha sonra respublikamızın tanınmış incəsənət xadimlərinin ifasında bədii hissə təqdim olunub.
