Abşeron Rayon İcra Hakimiyyətinin təşkilatçılığı ilə Xırdalan şəhərində yerləşən Heydər Əliyev Mərkəzində Konstitusiya və Suverenlik İli” çərçivəsində 1 oktyabr “Beynəlxalq Ahıllar Günü” münasibətilə “Ahılların konstitusion hüquqları və etibarlı müdafiə sistemi” mövzusunda dəyirmi masa keçirilib. Toplantıda Abşeron Rayon İcra Hakimiyyəti başçısının müavini Gülnar Rəhimova, Abşeron Rayon Ağsaqqallar Şurasının sədri, şəhid atası Məhərrəm İbadov, Rayon Ağsaqqallar Şurasının idarə heyətinin üzvləri və inzibati ərazilər üzrə rəhbərləri, Sosial Xidmətlər Agentliyinin Abşeron-Xızı Regional filialının müdir müavini Nurlan Məmmədzadə, RİH-nin hüquq şöbəsinin əməkdaşı İlahə Eyvazova, eləcə də ağsaqqallar və ziyalıları iştirak ediblər.
Tədbir Ümummilli Lider Heydər Əliyevin və Azərbaycanın ərazi bütövlüyü uğrunda canından keçmiş şəhidlərin xatirəsinin bir dəqiqəlik sükutla yad edilməsi ilə başlayıb.
Görüşdə çıxış edən Abşeron Rayon İcra Hakimiyyəti başçısının müavini Gülnar Rəhimova bildirib ki, BMT-nin Baş Assambleyası tərəfindən qəbul edilmiş 1990-cı il 14 dekabr tarixli qətnaməyə əsasən 1 oktyabr tarixi Beynəlxalq Ahıllar Günü kimi qeyd olunur. Həmin günün təsis edilməsinin başlıca məqsədi ailə və icmaların, eləcə də bütövlükdə cəmiyyətin həyatında ahıl insanların iştirakını fəallaşdırmaq, onların hüquqlarını və ehtiyaclarını diqqətə çatdırmaqdır. Qeyd olunub ki, bu əlamətdar gün 1993-cü ildən etibarən Azərbaycanda da hər il yüksək səviyyədə keçirilir.
G.Rəhimova çıxışında bildirib ki, Prezident İlham Əliyevin rəhbərliyi ilə həyata keçirilən islahatların mühüm istiqamətlərindən biri də, ahılların sosial müdafiəsinin gücləndirilməsi, bu islahatlar nəticəsində yaşlı insanların təqaüd və imtiyazlarla təmin olunması, onların rahat və layiqli həyat şəraitinin qurulması dövlət siyasətinin prioriteti kimi diqqət mərkəzində saxlanılmasıdır.
Qeyd olunub ki, Birinci vitse-prezident Mehriban xanım Əliyevanın təşəbbüsləri də bu sahədə xüsusi rol oynayır. Heydər Əliyev Fondunun sosial xidmət müəssisələrində, o cümlədən Qocalar evində mütəmadi keçirdiyi humanitar aksiyalar ahıl insanların mənəvi dəstəyinə çevrilir.
Eyni zamanda, vurğulanıb ki, yaşlı vətəndaşların pozulmuş hüquqlarının bərpası üçün qanunamüvafiq tədbirlər görülür. Onların mülkiyyət, əmək, sosial təminat, sağlamlıq və mənzil hüquqlarının qorunması, mövcud qanunvericiliyin beynəlxalq təcrübəyə uyğunlaşdırılması istiqamətində mütəmadi işlər aparılır. Ahıllara göstərilən sosial xidmətlərin səviyyəsinin yüksəldilməsi, xidmətlərin çeşidinin artırılması və onların asudə vaxtının daha səmərəli təşkili üçün müvafiq qurumlar tərəfindən lazımi tədbirlər həyata keçirilir.
Tədbirdə çıxış edən Abşeron Rayon Ağsaqqallar Şurasının sədri, şəhid atası Məhərrəm İbadov qeyd edib ki, ağsaqqallar gənc nəslin tərbiyəsində, milli-mənəvi dəyərlərin qorunub saxlanılmasında mühüm rol oynamalıdırlar. Dövlətin göstərdiyi diqqət və qayğı onların həm mənəvi dayaq, həm də nümunəvi fəaliyyət göstərməsinə imkan yaradır. Vurğulanıb ki, ahıl nəslin işğaldan azad olunmuş dədə baba yurdlarına “Böyük qayıdışı”, onların suveren ölkənin vətəndaşı kimi konstitusion hüquqlarının müdafiəsinin bariz nümunəsidir.
Sosial Xidmətlər Agentliyinin Abşeron-Xızı Regional filialının müdir müavini Nurlan Məmmədzadə çıxışında qeyd edib ki, agentlik tərəfindən ahıl vətəndaşların sosial xidmətlərə əlçatanlığının artırılması üçün müxtəlif layihələr həyata keçirilir, onların gündəlik həyat şəraitinin yaxşılaşdırılması istiqamətində mütəmadi tədbirlər görülür. Nurlan Məmmədzadə əlavə edib ki, bu istiqamətdə Günərzi qayğı mərkəzlərinin fəaliyyətinin genişləndirilməsi də xüsusi əhəmiyyət daşıyır. O vurğulayıb ki, hər bir ahılın cəmiyyətdə fəal, sağlam və mənalı həyat yaşaması üçün bütün imkanlar səfərbər olunur.
RİH-nin hüquq şöbəsinin əməkdaşı İlahə Eyvazova ölkəmizdə yaşlı insanların hüquqlarının qorunması istiqamətində davamlı addımların atıldığını, yeni etibarlı sosial müdafiə mexanizmlərin yaradılması üçün tədbirlər görülür.
Çıxışlardan sonra tədbir iştirakçıları ağsaqqallarla səmimi söhbət aparıb, təkliflər dinlənilib, habelə onların qayğı və ehtiyacları ilə maraqlanılıb.
