Abşeron Rayon İcra Hakimiyyətinin təşkilatçılığı ilə Xırdalan şəhərində yerləşən Heydər Əliyev Mərkəzində gənc sahibkarlarla görüş keçirilib. Tədbirdə Abşeron Rayon İcra Hakimiyyətinin və Abşeron-Xızı Regional Məşğulluq filialının məsul əməkdaşıları, o cümlədən KOBİA nümayəndəsi, gənc sahibkarlar və startapçılar iştirak ediblər.
Toplantıda çıxış edən dövlət rəsmiləri KOBİA-ların iqtisadiyyatın inkişafındakı rolundan söz açıb, sahibkarlarla biznes mühitinin yaxşılaşdırılmasına dəstək istiqamətlərində həyata keçirilən layihələr barədə sahibkarlara ətraflı məlumat verib. Həmçinin “Startapın müəyyən olunması meyarları”na əsasən, “Startap” şəhadətnaməsi əldə edən hüquqi və ya fiziki şəxslərin Azərbaycan Respublikasının Vergi Məcəlləsində nəzərdə tutulan azadolmadan istifadə hüququnun qazanmasından, “Startap” şəhadətnaməsi aldıqları tarixdən mikro və ya kiçik sahibkarlıq subyekti olan hüquqi şəxslərin mənfəət vergisindən, fərdi sahibkar kimi fəaliyyət göstərən fiziki şəxslərin gəlir vergisindən – 3 il müddətinə azad edilməsini qeyd edilib.
Tədbirdə Azərbaycan Respublikasının Prezidenti İlham Əliyevin 29 yanvar 2019-ci il tarixli, 500 nömrəli Fərmani ilə təsdiq edilmiş “Azərbaycan Respublikası regionlarının 2019–2023-cü illərdə sosial-iqtisadi inkişafı Dövlət Proqramı”nın 7.1.36 bəndinə əsasən gənclərin və qadınların regional inkişafda rolunun artırılması məqsədi ilə gənc sahibkarların və startapçıların inkişafı, onların bilik və bacarıqlarının formalaşdırılması ilə bağlı suallar geniş müzakirə olunub , gənc sahibkarları narahat edən məsələlərdən danışılıb, bu cür maarifləndirici tədbirlərin əhəmiyyəti vurğulanıb.
