"Azərbaycan Respublikası regionlarının 2019-2023-cü illərdə sosial-iqtisadi inkişafı Dövlət Proqramı"nın təsdiq edilməsi haqqında Azərbaycan Respublikası Prezidentinin 2019-cu il 29 yanvar tarixli 500 nömrəli Fərmanının 7.1.22. "ABAD" mərkəzləri şəbəkəsinin genişləndirilməsinin davam etdirilməsi və iri şirkətlər tərəfindən ailə təsərrüfatlarının dəstəklənməsinin təşviqi bəndinin icrası ilə bağlı Abşeron rayonu ərazisində mütəmadi olaraq maarifləndirmə tədbirləri həyata keçirilmişdir.
Bu tədbirlər çərçivəsində müxtəlif seminarlar, görüşlər və təlimlər keçirilib, sahibkarlara biznesin inkişafı və satış imkanlarının artırılması ilə bağlı tövsiyələr verilib. Belə ki, Abşeron Rayon İcra Hakimiyyətinin, İqtisadiyyat və Kənd Təsərrüfatı nazirliklərinin birgə təşkilatçılığı ilə Xırdalanda sahibkarlarla işgüzar forum keçirilib. "Ailə təsərrüfatlarının, kiçik və orta sahibkarların ABAD Publik Hüquqi şəxsi ilə birgə fəaliyyətinin təşviqi" mövzusunda baş tutan tədbirdə şəhər, qəsəbə və kənd inzibati ərazi dairələri üzrə nümayəndələr, bələdiyyələr, idarə, müəssisə, təşkilat rəhbərləri, kiçik və orta sahibkarlar, ailə təsərrüfatı nümayəndələri iştirak ediblər.
12 oktyabr 2022-ci il tarixdə Ekologiya və Təbii Sərvətlər Nazirliyi Dövlət Mineral Xammal Ehtiyatlarından İstifadə Agentliyi, İqtisadiyyat Nazirliyi yanında Əmlak Məsələləri Dövlət Xidməti, Kiçik və Orta Biznesin İnkişafı Agentliyi və Abşeron Rayon İcra Hakimiyyətinin nümayəndələrinin iştirakı ilə yer təki istifadəçiləri olan sahibkarlarla görüş keçirilmişdir. Görüş zamanı yer təki istifadəçilərinə qüvvədə olan qanunvericiliyin tələbləri izah edilməklə onları maraqlandıran məsələlər müzakirə edilmişdir.
