Abşeron rayonunda “Korrupsiyaya qarşı mübarizənin gücləndirilməsinə dair 2022─2026-cı illər üçün Milli Fəaliyyət Planı” üzrə Tədbirlər Planının 6.2 və 6.9-cu yarımbəndlərinin icrası məqsədi ilə “Korrupsiyaya birgə yox deyək” mövzusunda maarifləndirici silsilə tədbirlər keçirilib. Müvafiq qurumlarda keçirilən tədbirlərdə Abşeron RİH-in məsul əməkdaşları,bələdiyyələr və inzibati ərazi dairəsi üzrə nümayəndələr, idarə və müəssisə rəhbərləri, ictimai şuranın üzvləri və media nümayəndələri iştirak ediblər.
Tədbirlərdə korrupsiyanın cəmiyyətin hər bir sahəsində inkişafı əhəmiyyətli dərəcədə zəiflədən, idarəçiliyin səmərəliliyinə zərbə vuran, hüquq və azadlıqlarının pozulmasına gətirib çıxaran, qanunun aliliyinə təhlükə yaradan, əlverişli biznes mühitinin yaranmasına mane olan və digər mənfi təzahürlərə yol açan ciddi sosial bəla olduğu qeyd edilib.
Çıxış edənlər antikorrupsiya davranış modelinin formalaşdırılması və cəmiyyətdə məlumatlılığın artırılmasında medianın rolundan bəhs ediblər. Bildirilib ki, korrupsiyaya qarşı mübarizəyə dair müxtəlif illərdə qəbul olunmuş proqramların səmərəli tətbiqi və elektron xidmətlərdən istifadənin təşviqi nəticəsində dövlət qurumlarının fəaliyyətində şəffaflığa və vətəndaş məmnunluğunun artırılmasına nail olunmuşdur. Dövlət qurumları tərəfindən korrupsiyaya qarşı mübarizə sahəsində aparılan maarifləndirici tədbirlərdə media və vətəndaş cəmiyyəti institutları nümayəndələrinin iştirakına şərait yaradılması və bu barədə öz internet və sosial şəbəkə səhifələrində işıqlandırılmasının vacibliyi qeyd olunub. Həmçinin tədbirdə Rayon icra hakimiyyətinin “Rəqəmsal İcra Hakimiyyəti” portalı vasitəsilə göstərdiyi elektron xidmətlərin üstünlükləri barədə vətəndaşların mütəmadi məlumatlandırılması barədə inzibati ərazi dairəsi üzrə nümayəndələrə müvafiq tapşırıq və tövsiyələr verilib.
Tədbirlərdə korrupsiyaya qarşı mübarizəyə dair videoçarxlar nümayiş etdirilib və iştirakçıları maraqlandıran suallar cavablandırılıb.
Qeyd edək ki, “Korrupsiyaya qarşı mübarizənin gücləndirilməsinə dair 2022─2026-cı illər üçün Milli Fəaliyyət Planı” üzrə Tədbirlər Planının 6.2 və 6.9-cu yarımbəndlərinin icrası məqsədi ilə Abşeron rayonunda bir sıra maarifləndirici görüşlər və tədbirlər keçirilib. Belə ki, hər iki bəndin icrası ilə bağlı Xırdalan şəhərində, eləcəd də rayonun kənd və qəsəbələrində yerləşən təhsil və səhiyyə ocaqlarında cəmiyyətdə məlumatlılığın artırılmasına yönəlmiş maarifləndirici görüşlər keçirilib, dövlət qurumlarının və bələdiyyələrin internet və sosial şəbəkə səhifələrində, o cümlədən kütləvi informasiya vasitələrində müxtəlif videoçarxlar nümayiş etdirilib, eləcə də bukletlər hazırlanaraq sakinlərə paylanılıb.
