Azərbaycanda hər il yeni təhsil müəssisələrinin tikintisi və ya təmir-bərpası həyata keçirilir. Fevralın 1-də Abşeron rayonunda “Pirəkəşkül” körpələr evi-uşaq bağçası istifadəyə verilib. “St. Sumqayıt” ərazisində inşa olunan ikimərtəbəli məktəbəqədər uşaq müəssisəsi bütün lazımi avadanlıq və ləvazimatlar ilə təmin edilib.
Açılış mərasimində çıxış edən Abşeron Rayon İcra Hakimiyyəti başçısı Abdin Fərzəliyev, Abşeron-Xızı Regional Təhsil idarəsinin müdiri İlhamə Abdullayeva bildiriblər ki, bağça şəhid və qazi ailələrinin yaşadıqları kompleksdə tikilib. Üç korpusu olan 280 yerlik məktəbəqədər təhsil müəssisəsində bütün kollektiv bu təbəqədən olan ailələrin üzvlərindən ibarətdir.
Qeyd edək ki, Abşeron rayonunda ümumilikdə 31 məktəbəqədər təhsil müəssisəsi fəaliyyət göstərir. Onlardan 13-ü son 10 ildə inşa edilib. Rayonda həyata keçirilən tədbirlər sırasında uşaq bağçalarının tikintisi də diqqətdə saxlanılır.
