Abşeron Rayon Icra Hakimiyyətinin təşkilatçılığı ilə “Konstitusiya və Suverenlik İli” çərçivəsində “Suveren Azərbaycanda Təhsil Hüququnun Konstitusion təminatı” mövzusunda Azərbaycan Memarlıq və İnşaat Universitetinin (AzMİU) və Bakı Dövlət Universitetinin nəzdində İqtisadiyyat və Humanitar Kollecin rəhbər və müəllim heyətinin gənclərlə görüşləri keçirilib.
Xırdalan şəhərində yerləşən Heydər Əliyev Mərkəzində, eləcə də Bakı Dövlət Universitetinin nəzdində İqtisadiyyat və Humanitar Kollecində baş tutan görüşlərdə Abşeron rayon İcra Hakimiyyəti başçısının müavini Gülnar Rəhimova, Bakı Dövlət Universitetinin nəzdində İqtisadiyyat və Humanitar Kollecin direktoru Səhər Orucova, sözügedən universitet və kollecin rəhbər və müəllim heyəti, eləcə də rayonun ümumtəhsil məktəblərinin yuxarı sinif şagirdləri iştirak ediblər.
Görüşlərdə Qarabağ Universitetinin, habelə AzMİU-nun fəaliyyət istiqamətləri, ixtisasları barədə video təqdimatlar nümayiş etdirilib.
Tədbirlərdə çıxış edən RİH başçısının müavini Gülnar Rəhimova qeyd edib ki, bünövrəsi müasir Azərbaycan Respublikasının memarı, Ümummilli Lider Heydər Əliyev tərəfindən qoyulan təhsil strategiyası hazırda Azərbaycan Respublikasının Prezidenti cənab İlham Əliyev tərəfindən uğurla davam etdirilir, məqsədyönlü tapşırıqları əsasında icra edilən dövlət proqramları təhsil sistemində keyfiyyətcə yeni inkişaf meyillərinin əldə edilməsinə, yüksək nəticələrin qazanılmasına xidmət edir. RİH başçısının müavini G.Rəhimova Azərbaycan Respublikasının Prezidentinin 28 noyabr 2023-cü il tarixli sərəncamı ilə Xankəndidə yaradılan Qarabağ Universiteti və 2025/2026-cı tədris ilində burada bakalavriat səviyyəsinə tələbə qəbulu aparılacaq ixtisaslar haqqında ətraflı məlumat verib, ümumtəhsil məktəblərinin yuxarı sinif şagirdlərinin ixtisas və peşə seçiminə kömək məqsədilə bu cür tədbirlərin davamlı təşkilinə, tədbirdlərdə məktəb müəllimləri ilə yanaşı valideynlərin iştirakının vacibliyini qeyd edib.
Abşeron rayonu Heydər Əliyev Mərkəzində AzMİU-nun professor və müəllim heyəti tərəfindən şagirdlər üçün keçirilən görüşdə universitet haqqında, həmçinin universitetə qəbul qaydaları, xüsusi qabiliyyət tələb edən ixtisasların müsabiqə şərtləri, tələb olunan əsas göstəricilər, eyni zamanda, ikili diplom proqramları və onlara müraciət qaydaları, ixtisaslar, fakültələr, təhsil haqqı məsələləri, ixtisaslar üzrə ölkədə və xaricdə təcrübə şansları istiqamətində ətraflı məlumat, gələcək abituriyentləri maraqlandıran suallar cavablandırılıb, təbliğat-təşviqat qrupunun üzvləri ixtisas seçimində çətinlik çəkən məktəblilərə dəyərli məsləhət veriblər.
BDU-nun nəzdində İqtisadiyyat və Humanitar Kollecində keçirilən tədbirdə isə filologiya üzrə elmlər doktoru, professor Səhər Orucova tərəfindən tələbələrə orta ixtisas təhsilini bitirən subbakalavrların ali təhsil müəssisələrinin bakalavriat səviyyəsinə qəbulu ilə bağlı ətraflı məlumat verilib.
[/center]
