Abşeron rayonunda su ehtiyatlarından səmərəli və qənaətli istifadənin təşviqi istiqamətində maarifləndirmə tədbirləri genişləndirilir. Azərbaycan Respublikasının Prezidenti cənab İlham Əliyevin 10 oktyabr 2024-cü il tarixli, 320 nömrəli Sərəncamı ilə təsdiq edilmiş “Su ehtiyatlarından səmərəli istifadəyə dair Milli Strategiya”nın icrası rayonda ardıcıl şəkildə davam etdirilir.
Strategiyanın müvafiq bəndlərinə uyğun olaraq əhalinin sudan məsuliyyətli istifadəyə cəlb edilməsi məqsədilə Abşeron Rayon İcra Hakimiyyətinin başçısının iştirakı ilə rayonun müxtəlif yaşayış məntəqələrində mütəmadi səyyar görüşlər təşkil olunur. Görüşlərdə aidiyyəti dövlət qurumlarının rəhbər şəxsləri və “Azərsu” Açıq Səhmdar Cəmiyyətinin nümayəndələri iştirak edirlər.
Səyyar görüşlər zamanı sakinlərin içməli su təchizatı və suvarma ilə bağlı müraciətləri yerində araşdırılır, mövcud imkanlar çərçivəsində operativ tədbirlər görülür. Eyni zamanda sudan səmərəli və qənaətli istifadənin əhəmiyyəti izah olunur, su ehtiyatlarının qorunması və israfçılığın qarşısının alınması ilə bağlı maarifləndirici məlumatlar verilir.
Bununla yanaşı, Abşeron rayonu ərazisində içməli sudan qanunsuz istifadə hallarının qarşısının alınması məqsədilə nəzarət tədbirləri gücləndirilib. 2025-ci il ərzində aparılan araşdırmalar nəticəsində Masazır, Saray və Qobu qəsəbələrinin yeni yaşayış massivlərində sudan uçotsuz və sayğacdankənar istifadə halları aşkar edilib.
Müəyyən edilmiş faktlar üzrə qanunvericiliyə uyğun tədbirlər görülüb, özbaşına çəkilmiş xətlər və qanunsuz qoşulmalar ləğv edilib, dəymiş ziyan hesablanaraq müvafiq qaydada rəsmiləşdirilib.
