Gənc nəsli ətraf mühitin qorunması, tullantıların azaldılması və təkrar emalın əhəmiyyəti barədə məlumatlandırmaq məqsədilə Abşeron rayon Məmmədli kənd tam orta məktəbin 10-cu sinif şagirdləri ilə maarifləndirici görüş təşkil olunub.
Ekologiya və Təbii Sərvətlər Nazirliyindən bildirilib ki, görüş zamanı şagirdlərə tullantıların düzgün çeşidlənməsi və idarə olunması qaydaları, təkrar emalın əhəmiyyəti, təbii resursların qorunmasında təkrar emalın rolu və ölkəmizdə bu sahədə tətbiq olunan qanunvericilik tələbləri ilə bağlı məlumatlar verilib, onları maraqlandıran suallar cavablandırılıb.
Daha sonra “Batareyaları ver, təbiəti qoru” layihəsinə qoşulmuş Məmmədli kənd tam orta məktəbin şagirdləri 14 kiloqram batareya təhvil veriblər.
Qeyd edək ki, interaktiv formatda keçirilən görüşlər “Azərbaycanda plastik tullantıların ekoloji cəhətdən səmərəli idarə edilməsinin təşviqi və innovativ təkrar emal həllərinin tətbiqi” layihəsi çərçivəsində keçirilir. Layihə Bazel Konvensiyasının “Plastik Tullantı Tərəfdaşlığı” proqramı çərçivəsində Azərbaycan Respublikasının Ekologiya və Təbii Sərvətlər Nazirliyinin tərəfdaşlığı və Qafqaz üzrə Regional Ekoloji Mərkəzin təşkilatçılığı ilə həyata keçirilir.
