“Bitki mühafizəsi vasitələrindən və aqrokimyəvi maddələrdən normativlərə uyğun istifadənin təşviqi” bəndinin icrası ilə bağlı Abşeron rayonunda bitki mühafizəsi vasitələri və aqrokimyəvi maddələrin normativlərə uyğun istifadəsinin təşviqi istiqamətində bir sıra tədbirlər həyata keçirilmişdir.
Tədbirlərdə müxtəlif bitki və bitkiçilik sahəsində fəaliyyət göstərən fərdi ailə təsərrüfatları, sahibkarlıq subyektləri, aqronomlar və bitki mühafizə vasitələrinin satışı apteklərinin nümayəndələri, eləcə də Kiçik və Orta Biznesin İnkişaf Agentliyi və Dövlət Aqrar İnkişaf Agentliyinin regional bölmələrinin nümayəndələri iştirak ediblər.
Görüşlər zamanı pestisidlərin, bioloji preparatların və aqrokimyəvi maddələrin dövlət sınağının aparılması, qeydiyyata alınması barədə qanunvericiliyin tələbləri izah edilib, bitki sağlamlığı ilə bağlı həyata keçirilən fitosanitar tədbirlər, pestisid və aqrokimyəvi preparatlardan təhlükəsiz istifadə qaydaları barədə geniş məlumat verilib. Eyni zamanda sahibkarlar istifadəsinə icazə verilmiş preparatların siyahısı ilə tanış olublar.
Sonda iştirakçıların sualları cavablandırılıb.
Qeyd edək ki, bitki mühafizə vasitələrindən və aqrokimyəvi maddələrdən istifadənin düzgün təşkili və onlardan istifadə zamanı təhlükəsizlik və gigiyena qaydalarına riayət edilməsinin təşviq olunması məqsədi ilə rayon ərazisində fəaliyyət göstərən Kənd Təsərrüfatı Nazirliyinin müvafiq qurumu tərəfindən istixana komplekslərinin və bitkiçilik sahəsində fəaliyyət göstərən təsərrüfat subyektlərinin nümayəndələri ilə mütəmadi görüşlər keçirilir, Abşeron rayonunda bitki mühafizəsi vasitələri və aqrokimyəvi maddələrin normativlərə uyğun istifadəsi təşviq edilir və bu sahədə maarifləndirmə işləri aparılır.
