Azərbaycan milli mətbuatı xalqımızın azadlıq, müstəqillik və demokratik dəyərlər uğrunda mübarizəsinin tərkib hissəsi kimi şərəfli bir yol keçmişdir. Ulu Öndər Heydər Əliyevin “Azadlıq, demokratiya, müstəqillik uğrunda mücadilə dərslərini biz milli mətbuatımızın səhifələrindən öyrənmişik” fikri Azərbaycan mətbuatının tarixi missiyasını və ictimai rolunu aydın şəkildə ifadə edir.
Milli mətbuatın əsası 1875-ci il iyulun 22-də Həsən bəy Zərdabinin yaratdığı “Əkinçi” qəzeti ilə qoyulmuşdur. Bu qəzetin fəaliyyəti maarifçilik ideyalarının yayılmasında və milli şüurun formalaşmasında mühüm rol oynamışdır. “Əkinçi”nin ömrü qısa olsa da, onun təsiri uzunmüddətli və dərin olub. Zamanla “Ziya”, “Füyuzat”, “Molla Nəsrəddin”, “İrşad” kimi anadilli nəşrlər milli maarifçilik və ədəbi dəyərlərin daşıyıcısına çevrilmişdir.
Azərbaycan xalqının XX əsrdə qazandığı müstəqillik mətbuatın inkişafında yeni bir mərhələnin əsasını qoydu. 1993-cü ildən etibarən Ümummilli Lider Heydər Əliyevin rəhbərliyi ilə senzuranın ləğvi, söz və məlumat azadlığının təmin olunması, KİV-lərin iqtisadi müstəqilliyinin gücləndirilməsi kimi köklü islahatlar həyata keçirildi. Ulu Öndər, həmçinin mətbuata dövlət səviyyəsində dəstək verərək jurnalistlərin sosial rifahına və peşəkar inkişafına xüsusi qayğı göstərdi.
Prezident İlham Əliyev də bu siyasəti ardıcıl şəkildə davam etdirərək, medianın azad və peşəkar fəaliyyətini təmin edən hüquqi bazanı təkmilləşdirmiş, “Media haqqında” yeni Qanunun qəbul olunmasına, MEDİA Agentliyinin yaradılmasına və jurnalistlərə sosial təminatın gücləndirilməsinə nail olmuşdur. Eyni zamanda, media subyektlərinə vergi güzəştlərinin verilməsi, internet qəzetçiliyin təşviqi, gənc jurnalistlərin mənzil probleminin həlli istiqamətində görülən işlər də media siyasətinin sosial yönümlü olduğunu göstərir.
Azərbaycan mətbuatı İkinci Qarabağ müharibəsində əsl vətənpərvərlik, həmrəylik və informasiya səfərbərliyi nümunəsi göstərmiş, düşmən təbliğatına qarşı informasiya cəbhəsində mübarizənin ön sıralarında dayanmışdır. Bu gün də işğaldan azad edilmiş ərazilərimizdən yayımlanan informasiyalar vasitəsilə xalqımızın qəhrəmanlıq salnaməsi və quruculuq fəaliyyəti dünya ictimaiyyətinə çatdırılır.
Beynəlxalq media əməkdaşlığı da diqqətçəkicidir. Azərbaycan və Türkiyə arasında imzalanan media sahəsində strateji əməkdaşlıq memorandumu, birgə media platformalarının yaradılması, Şuşada keçirilən Qlobal Media Forumlar bu sahədə mütərəqqi təşəbbüslərin nümunəsidir.
Müasir çağırışlara cavab verən Azərbaycan mətbuatı informasiya texnologiyalarının imkanlarını geniş şəkildə tətbiq edir. Süni intellektin media sahəsində tətbiqi, dezinformasiyaya qarşı mübarizə, media savadlılığının artırılması yeni dövrün tələblərindəndir. Bu baxımdan, milli media həm informasiya təhlükəsizliyi, həm də cəmiyyətin maarifləndirilməsi sahəsində mühüm rol oynayır.
Milli mətbuatın 150 illik yubileyinin dövlət səviyyəsində qeyd olunması yalnız tarixi keçmişin xatırlanması deyil, eyni zamanda gələcəyə baxış və medianın strateji əhəmiyyətinə verilən yüksək qiymətdir. Prezident İlham Əliyevin “Mətbuat azadlığı bizim prioritet məsələmizdir” bəyanatı Azərbaycan mediasının demokratik dəyərlər sistemindəki yerini və əhəmiyyətini bir daha vurğulayır.
Bu gün Azərbaycan mətbuatı təkcə informasiya daşıyıcısı deyil, eyni zamanda milli həmrəyliyin, vətənpərvərlik ruhunun, ictimai düşüncənin formalaşmasında aparıcı qüvvəyə çevrilmişdir. Qarşıdan gələn dövrdə də milli medianın peşəkarlıq, məsuliyyət və milli maraqlara sədaqət prinsipləri əsasında inkişaf edəcəyinə heç bir şübhə yoxdur.
Mehriban Xudaverdiyeva,
Abşeron RİH könüllüsü,
Bakı Mühəndislik Universitetinin İctimaiyyətlə Əlaqələr üzrə
1-ci kurs Magistratura tələbəsi
