Abşeron rayonunda 5 Oktyabr – Beynəlxalq Müəllimlər Günü münasibətilə tədbir təşkil olunub. Tədbir Abşeron Rayon İcra Hakimiyyəti və RİH yanında İctimai Şuranın birgə təşkilatçılığı ilə Heydər Əliyev Mərkəzində baş tutub. Rayonun təhsil müəssisələrinin əməkdaşları tədbirdə iştirak ediblər.
Tədbir iştirakçıları əvvəlcə Ümummilli Lider Heydər Əliyevin, eləcə də torpaqlarımızın bütövlüyü uğrunda canlarından keçmiş şəhidlərin xatirəsini bir dəqiqəlik sükutla yad ediblər.
Abşeron Rayon İcra Hakimiyyətinin başçısının müavini Gülnar Rəhimova çıxışında Beynəlxalq Müəllimlər Günü münasibətilə təhsil işçilərini təbrik edərək ölkəmizdə, o cümlədən Abşeron rayonunda həyata keçirilən təhsil sahəsi ilə bağlı işlərdən danışıb. O qeyd edib ki, Ümummilli Lider Heydər Əliyev hər zaman təhsil işçilərinə diqqət və qayğı göstərib və bu siyasət Prezident İlham Əliyev tərəfindən uğurla davam etdirilir.
G.Rəhimova çıxışında bildirib ki, son illərdə Abşeron rayonunda təhsil infrastrukturunun yenilənməsi istiqamətində mühüm işlər həyata keçirilib. Belə ki, Xırdalan şəhər 8 nömrəli tam orta məktəb, Hökməli qəsəbə tam orta məktəb və Saray qəsəbə 1 nömrəli tam orta məktəb əsaslı şəkildə yenidən qurulub, Saray qəsəbə 4 nömrəli tam orta məktəb isə yeni inşa edilərək istifadəyə verilib. Bu layihələr rayon üzrə təhsil müəssisələrinin maddi-texniki bazasının gücləndirilməsinə, tədris prosesinin keyfiyyətinin yüksəldilməsinə və müəllimlərin fəaliyyət şəraitinin yaxşılaşdırılmasına xidmət edir.
Başçının müavini həmçinin vurğulayıb ki, Azərbaycan Respublikasının Birinci vitse-prezidenti Mehriban xanım Əliyevanın rəhbərliyi ilə Heydər Əliyev Fondunun ölkəmizdə, o cümlədən Abşeron rayonunda təhsil sahəsinin inkişafına göstərdiyi davamlı dəstək, təhsil müəssisələrinin modernləşdirilməsi və müəllimlərin peşə fəaliyyətinin təkmilləşdirilməsi sahəsində mühüm rol oynayır və xalqımız tərəfindən böyük rəğbət və minnətdarlıqla qarşılanır.
Tədbirdə Vətən Müharibəsi şəhidi Elçin Həsənlinin anası və Abşeron RİH yanında İctimai Şuranın sədri Xatirə İsmayılova çıxış edərək rayonda təhsilin inkişafı sahəsində əldə olunan nailiyyətlərdən, təhsilin keyfiyyətinin artırılması məqsədilə görülən işlərdən və qarşıda duran vəzifələrdən danışıb.
Tədbir çərçivəsində Abşeron Rayon İcra Hakimiyyəti və RİH yanında İctimai Şura tərəfindən fəaliyyətində fərqlənmiş bir qrup təhsil işçisinə Fəxri Fərmanlar və Təşəkkürnamələr təqdim olunub.
