Xalqımızın Ümummilli Lideri Heydər Əliyevin anadan olmasının 99-cu ildönümü ilə əlaqədar Hərbi Qənimətlər Parkının ərazisində hazırlanmış xüsusi zonada respublika məktəbliləri arasında "Şahin" hərbi-idman oyunlarının final mərhələsi keçirilib. Tədbirdə əvvəlcə Ulu Öndər Heydər Əliyevin və torpaqlarımızın azadlığı uğrunda şəhid olan igidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət himni oxunub.
Tədbirdə çıxış edən Gənclər və idman naziri Fərid Qayıbov, təhsil nazirinin müavini Firudin Qurbanov, Müdafiə Nazirliyinin idarə rəisinin müavini Elşad Əbilov, Səfərbərlik və Hərbi Xidmətə Çağırış üzrə Dövlət Xidmətinin idarə rəisi Füzuli İsmayılov, Respublika Veteranlar Şurasının sədr müavini Cəlil Xəlilov “Şahin”lərə uğurlar arzulayıblar. Bildirilib ki, hər il keçirilən "Şahin" hərbi-idman oyunlarında məktəblilər böyük fəallıq göstərirlər.
Gənclərin vətənpərvər, xalqa və dövlətə sədaqət ruhunda tərbiyə olunmasında, gələcək hərbi xidmətə hazırlanmasında belə tədbirlərin əhəmiyyətini qeyd edən natiqlər vurğulayıblar ki, Şahin" hərbi-idman oyunlarının respublika final mərhələsinin ümummilli lider Heydər Əliyevin doğum günündə keçirilməsi artıq ənənəyə çevrilib.
Sonra məktəblilər hərbi orkestrinin ifa etdiyi hərbi marşların sədaları altında təntənə ilə tribunanın önündən keçib, peşəkarlıqlarını nümayiş etdiriblər. Hakimlər isə onların hərəkətlərinə diqqət yetirib və müvafiq balla qiymətləndiriblər.
18 komandanın mübarizə apardığı hərbi-idman oyununda Abşeron rayonun komandası ümumi hesabda dördüncü yerə, “Fiziki hazırlıq” mərhələsində isə birinci yerə layiq görülüb.
