Abşeron Rayon İcra Hakimiyyətinin dəstəyi və Abşeron Rayon Gənclər və İdman İdarəsinin təşkilatçılığı ilə 8 noyabr - Zəfər Gününə həsr olunmuş uşaq yeniyetmə və gənclər arasında Kyokuşin Karate idman növü üzrə "Zəfər kuboku"adlı Abşeron Rayonun açıq turniri keçirilib.
Turnirin açılış mərasimində əvvəlcə xalqımızın ümummilli lideri Heydər Əliyevin və Azərbaycanın suverenliyi, müstəqilliyi və ərazi bütövlüyü uğrunda canından keçən şəhidlərimizin xatirəsi bir dəqiqəlik sükutla yad edilib. Azərbaycan Respublikasının Dövlət Himni səsləndirilib.
Açılış mərasimindən sonra Abşeron Rayon Gənclər və İdman idarəsinin rəisi Əsgər Əmirəliyev, YAP Abşeron Rayon Təşkilatının sədri Abbas Əliyev, Azərbaycan Respublikası “OYAMA” döyüş növləri İdman klubu ictimai birliyinin və Beynəlxalq İFK Kyokuşin karate təşkilatının Azərbaycan nümayəndəliyinin rəhbəri Elşad Əliyev çıxış edərək xalqımızın tarixinə şanlı, qızıl hərflərlə yazılan 8 noyabr-Zəfər günü ilə bağlı fikirlərini bildirdilər, yarışın mahiyyətindən danışıblar.
Çıxışlardan sonra milli rəqs qruplarının və gimnastların iştirakı, idmançıların nümunəvi çıxışları ilə bədii hissə keçirilib. Bədii hissədən sonra yarışa start verilib.
400 nəfər idmançının iştirak etdiyi yarışda 6 yaş qrupu üzrə 60 çəki dərəcəsində aparılan mübarizədə qalib olan və mükafata layiq yerlər tutan 180 nəfər uşaq, yeniyetmə və gənc Abşeron Rayon Gənclər və İdman idarəsi tərəfindən diplom və medallarla təltif olunub.
