Sumqayıt Regional Mədəniyyət İdarəsinə tabeli, Abşeron Rayon Mehdiabad qəsəbə Uşaq Musiqi Məktəbi, Xırdalan şəhər "Mədəniyyət Mərkəzində" möhtəşəm konsert proqramı ilə çıxış edib.
Tədbirdə Sumqayıt Regional Mədəniyyət İdarəsinin rəisi Rəşad Əliyev, Abşeron Rayon üzrə baş məsləhətçi İlham Manafov, bir neçə məktəb direktorları və digər fəxri qonaqlar iştirak ediblər.
Əvvəlcə vətən uğrunda canlarından keçən şəhidlərimizin əziz xatirəsi 1 dəqiqəlik sükutla yad edilib. Tədbir məktəbin xanəndəlik ixtisası üzrə 5-ci sinif şagirdi Ülvi Ağamalızadənin ifasında "Bayatı-Şiraz" la başlanıb. 19 nömrədən ibarət olan geniş repertüarda xor kollektivinin ifasında görkəmli Azərbaycan bəstəkarı Rauf Hacıyevin "Azərbaycan", Telman Hacıyevin "Abşeron", "Azadlıq marşı", şagirdlərin ifasında "Qarabağ", qarmonçalanlar ansamblının ifasında Yalçın Rzazadənin "İncə bellim", nağaraçalanlar ansamblının ifasında "Rahab rəngi", sazçalanlar ansamblının ifasında "Şirvan müxəmməsi", "Azərbaycanım" və digər ixtisaslar üzrə təhsil alan şagirdlərin də ifalarında müxtəlif bəstəkarların əsərləri səsləndirilib.
Bədii hissənin sonunda xanəndə ixtisası üzrə çalışan Zabitə Əhmədli və Səkinə Şamilova müəllimlərdən ibarət ansamblın ifasında Rauf Məmmədovun "Sən mənimsən Qarabağ", Ələkbər Tağıyevin "Qəşəngdir", həmçinin məktəbin skripka müəllimi Əkbər Rəhman, Nuray Əkbərlə birgə "Bayraq mahnısı" nı ifa ediblər.
Tədbirin sonunda çıxış edən Sumqayıt Regional Mədəniyyət İdarəsinin rəisi Rəşad Əliyev, belə tədbirə görə Abşeron rayon üzrə baş məsləhətçi İlham Manafovu, məktəbin direktoru Təranə İbrahimovanı eyni zamanda müəllim və şagird kollektivini təbrik edərək, uğurlar arzulayıb. O, Azərbaycan Respublikasının Prezidenti cənab İlham Əliyev tərəfindən Şuşanın "Mədəniyyət paytaxtı" elan edildiyini vurğulayaraq, estetik zövqün formalaşmasında belə tədbirlərin əhəmiyyətini xüsusi qeyd edib.
Məktəbin direktoru Təranə İbrahimova da öz növbəsində konserti maraqla izlədiklərinə görə bütün qonaqlara, fəal iştiraklarına görə isə müəllim və şagird kollektivinə təşəkkürünü bildirib.
