Əmək və Əhalinin Sosial Müdafiəsi Nazirliyinin tabeliyindəki Əmək Bazarı və Sosial Müdafiə Məsələləri üzrə Milli Observatoriyanın sədri Elşən Əsədov ölkəmizin şanlı Zəfəri ilə başa çatan Vətən müharibəsinin şəhidi Rufiz Budaqovun ailəsini ziyarət edib və onun övladları – Günay, Könül və Rəvanla görüşüb.
Nazirliyin İctimaiyyətlə əlaqələr və kommunikasiya şöbəsindən AZƏRTAC-a verilən məlumata görə, Tərtər rayonunun Talış kəndinin azad edilməsi uğrunda döyüşlərdə şəhid olan tank komandiri Rufiz Budaqov Prezident İlham Əliyevin Sərəncamları ilə “Vətən uğrunda”, “Suqovuşanın azad olunmasına görə” medalları və “Qarabağ” ordeni ilə təltif edilib.
Şəhidin ailəsi dövlətin sosial dəstək tədbirləri ilə əhatə olunub. Ailəyə birdəfəlik sığorta ödənişi verilib. Əmək və Əhalinin Sosial Müdafiəsi Nazirliyi tərəfindən ailə paytaxtın Masazır qəsəbəsində mənzillə təmin edilib, ailə üzvlərinə (ana, ata, həyat yoldaşı və 3 övladı) Prezidentin aylıq təqaüdü, ailə başçısını itirməyə görə pensiya təyinatı aparılıb.
Görüş zamanı E.Əsədov şəhidin ailə üzvləri ilə söhbət edib, onların qayğıları ilə maraqlanıb. O, torpaqlarımızın azadlığı uğrunda şəhidlik zirvəsinə yüksələn bütün qəhrəmanlarımızın, eləcə də Rufiz Budaqovun xatirəsinin xalqımızın qəlbində daim yaşayacağını qeyd edib.
Ailənin sosial vəziyyətinin bundan sonra da diqqətdə saxlanacağı bildirilib.
