Abşeron Rayon İcra Hakimiyyətinin (RİH) tədbirlər planına uyğun olaraq rayonun Məmmədli kəndində ümummilli lider Heydər Əliyevin anadan olmasının 99-cu ildönümünə həsr olunan uşu-sanda idman növü üzrə turnir keçirilib.
Əvvəlcə Azərbaycan Respublikasının Dövlət Himni oxunub, ulu öndər Heydər Əliyevin və ərazi bütövlüyümüz uğrunda şəhid olan vətən övladlarının xatirəsi bir dəqiqəlik sükutla yad edilib.
" Yanardağ Tarix Mədəniyyət və Təbiət Qoruğu"nda reallaşan tədbirin rəsmi hissəsində Abşeron RİH başçısının Məmmədli kənd inzibati ərazi dairəsi üzrə nümayəndəsi Elmar Abbasov, Abşeron RİH-in əməkdaşı Məhərrəm Abdulov, Məmmədli kənd bələdiyyəsinin sədri Vasif Məmmədov çıxış edərək qeyd ediblər ki, müasir Azərbaycan tarixinin yaradıcısı ümummilli lider Heydər Əliyev xalqımızın qürur mənbəyi, tarixi bir şəxsiyyət olaraq yaddaşlara əbədi həkk olunub. Azərbaycanı canı qədər sevən, ürəyi daim xalqının səadəti, xoşbəxtliyi uğrunda döyünən, ölkəsini azad və müstəqil görmək istəyən Ulu Öndərin mənalı ömür yolunun hər anı, hər səhifəsi bugünkü və gələcək nəsillərə nümunə olacaq unudulmaz tarixdir.
Sonra yarışa start verilib. Gərgin idman mübarizəsi şəraitində keçən turnirin sonunda qaliblərə diplom və medallar təqdim edilib.
Mükafatlandırma mərasimindən sonra tədbir bədii hissə ilə davam edib.
